注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

BM独瘾-------2004年325i(E46)  

2014-09-30 11:09:25|  分类: 试车日记 |  标签: |举报 |字号 订阅

  下载LOFTER 我的照片书  |
BM独瘾-------2004年325i(E46) - Ryan  - 粤车无数
 
二手车,到你手唔一定真系第二手,尤其系一D超过十年嘅车,所以旧车应该系叫做“易手车”而唔系“二手车”。通常去买一部超过十年嘅易手车,一般都系得三个原因,第一种系纯粹唔够钱,想买部新D都唔得;第二种系充大头鬼,比如得8万蚊系手,距唔去买部新飞度,而走去买一部旧款3系;第三种就系情意结,以前可能因为未做野甚至读紧书未有钱,到有钱嘅时候自己中意果款车已经唔出,所以就会买翻部一模一样嘅翻黎怀缅下。虽然买旧车有好多原因,但系要系中国呢个造假圣地买一部靓嘅车绝对唔系咁简单,除左你要对呢个型号熟悉之外,仲要大胆假设、小心求证,今次为大家介绍一部2004年嘅宝马325i,因为呢款车造假几率相当高,一个唔觉意就好容易中招。
BM独瘾-------2004年325i(E46) - Ryan  - 粤车无数
 呢一代宝马3系嘅底盘编号系E46,最初系1998年出现,但系当时嘅款式同呢一部有D唔同,呢一部系2004年车,属于尾期款式。我地可以买到嘅E46分进口同国产版,先讲进口版,宝马系德国有厂,其实系南非都有,主要区别就在于车身组装有D唔同,德国就用机械手,而南非就请左班黑人。再讲讲国产版,虽然华晨宝马系2003年引入呢只车,属于小改款之后嘅型号,不过与其话国产,其实都系系本地装嵌,因为零件都系进口零件。E46嘅3系比较圆,原装已经有黑底头灯,观感同一般家庭房车好唔同,咁验车果阵睇咩呢?首先望下六件玻璃有无BMW标志先,然之后睇下车门有无鸳鸯色,最后睇下泵把、头尾灯fit唔fit位,因为当年呢只车嘅装工系好顶级嘅,绝对唔会装到甩头甩骨。
BM独瘾-------2004年325i(E46) - Ryan  - 粤车无数
 好多超过十年嘅车都会矮过新车嘅时候,因为四支避震已经打柴,但系E46唔同,因为距新车果阵已经系咁矮,除左车身侧面有明显骨线之外,仲有就系宝马迷最中意嘅蓝色镜片倒后镜,咁呢D都系E46好明显嘅特征。呢部车周围都有黑色嘅防擦胶边,而倒车雷达都系嵌系车尾嘅防擦黑胶里面。特别要讲讲呢个倒车雷达,因为呢几粒野真系好准,我都有试过当年嘅S320,果部大BENZ仲要前后都有感应器,不过倒车就好迟先出声,倒车嘅提示音唔够宝马渐进,尤其系由D、D、D一直到长响,到你听到长响,可能已经撞左,而呢部325i就无呢个问题。最后记得打开尾箱,吴系睇下大吴大,而系睇下备胎果个坑有无水渍。
BM独瘾-------2004年325i(E46) - Ryan  - 粤车无数
唔好睇距车仔细细,距只车门系好重嘅,另外我见到网上好多卖家都话自己部车系M版,咁你就要停一停啉一啉。乜嘢系M版呢,其实就系一部包装过嘅E46,当年如果真系有E46嘅M版,首先距系唔会有一个木太盘,更加唔会系木嘅波棍头,而且张凳系会有电动腰垫,最紧要系M版一定系黑色天花板。睇E46除左睇下四只窗上落顺唔顺之外,仲有几样野要留意,第一就系仪表板,车行卖嘅车十架有十架都会调公里数,所以只能够参考,最终都系要靠经验睇下内笼残吴残,你睇多十架八架同期嘅车就会心中有数。仪表板右边有支棍仔,其实距系用黎较时钟嘅,所以唔系噤,而系要黎拧。第二样就系电凳,好多超过十年嘅宝马都系坏呢样。第三样系冷气,E46嘅冷气泵系缺陷黎嘅,试车要开冷气开到最冻,仲要开到最大风,睇下有无怪味,呢个时候仲要睇下引擎怠速有无震,转速支针会唔会浮动。
BM独瘾-------2004年325i(E46) - Ryan  - 粤车无数
 如果你细心,就会发现E46系一个杯架都无嘅,而且门边都无可以放饮品嘅凹槽,扶手箱中间都系放吴到嘅。另外,呢部车嘅电窗控制系装系波棍座隔离,其实咁样都有好处,就系落雨开小小窗通风吴会咁易撇湿。E46嘅木饰件同皮料都非常之襟新,唯独系支手刹松松地,拉三四格都锁吴住只辘。
BM独瘾-------2004年325i(E46) - Ryan  - 粤车无数
 E46后排就好细嘅,同当年嘅宝来后排差吴多,不过呢个后排就好少坐人嘅,首先系吴好坐,其次就系买3系嘅一般都系自己渣,所以E46嘅后排一般都会偏新净,系度要特别提一提,当年E46有成十个气囊,但系宝马当年曾经召回过2002到2003年出产嘅E46,当时召回主要系话距个气囊有问题,果一批车嘅气囊系由日本高田株式会社整嘅,所以吴系话气囊多就好。
BM独瘾-------2004年325i(E46) - Ryan  - 粤车无数
  呢部车用左一副编号M54B25嘅直六自然吸气引擎,最大马力系192匹,最大扭力系24公斤米,行一个五前速自动波,有加减波功能。成日都见人讲直六引擎点好点好,其实有咩好呢?直六引擎系吴需要装曲轴嘅平衡轴嘅,因为本身嘅平衡性已经做得好好,可以将活塞上上下下嘅惯性摆动抵消,当然前提系零件要做好配重,所以好考引擎嘅装嵌功夫。既然无左呢个额外嘅平衡轴,吴需要牺牲自己嘅能量去平衡震动,所以直六引擎嘅转速系扯得特别顺嘅。有优点自然亦会有缺点,直六引擎一般都好长,所以你见到直六一般都系打竖摆,而且装直六引擎嘅引擎舱都会好大,引擎长自然曲轴就长,所以难度就在于呢支曲轴要够硬,又要轻,仲要低成本。咁E46引擎要点样睇呢?首先打开车头盖睇下龙门架、避震机塔顶有无烧焊,检查水箱水够吴够,睇下有无水沟油,水沟油即系冷却水入左去机油油路,如果部车本身系烧机油嘅就会连冷却水都烧埋,所以遇到呢D就吴好买。如果可以升高架车睇,就睇下车阵有无烧焊,轴承有无烂,车底有无生锈有无霉,另外就系E46嘅漏油问题都几劲嘅,比如封油太油壶油喉漏油、油底壳垫漏油、VANOS喉漏油、哇佬冚胶边漏油。除左漏油距仲好兴漏水,比如水箱嘅上下水喉漏水、水泵漏水呢D。除左呢D之外,机脚胶老化、皮带老化都系正常损耗,都系要视乎上一手点保养。仲有就系跟住就可以检查波箱,首先P、R、N、D几个档位睇下有无明显chok,然之后去翻P档,比油定住系3000转,定住几秒,跟住即刻缩脚,睇下转速支针有无震下震下咁跌。原地试踩过之后,记得调好晒凳同镜,咁就可以出路面试。首先你要试下慢速放开个太盘,睇下部车有无自己转弯,跟住试下打太,睇下有无声系车底传出黎,同埋睇下有无突然间有野阻阻你,然之后稳个斜坡,上坡过阵顺便试下波箱加减有无问题,然后要稳一段稍微有暗斜嘅路,N档溜车大概溜三四米,跟住你踩实刹车,如果听到车头有“eng”一声,咁就即系鸡比杯士有问题,一换就要换晒两边。试完呢D慢速野,就要试下D高速野,尽量稳D封闭路面,最好可以踩到80到100咁,睇下堂太会吴会震,睇下有无抢太,跟住刹车,又系睇下堂太会吴会震,睇下有无抢太。试玩晒所有危险项目之后,就要认真咁睇下部车嘅水温,因为直六引擎嘅散热不嬲都系一个问题,尤其系E46呢D车,引擎舱虽然大,但系比D零件塞满晒,水温高可以好容易,咁当然,吴一定系机件故障,因为水箱水里面有气,都可以导致水温高。如果以上问题全部都无,E46嘅行车水准绝对系高过宜家新款嘅F30,虽然M54B25呢个引擎,力水系集中系中后段,起步无咩优势,但系睇住转数升高,就会系另外一个世界,仲有直六特有果种“嘈”,同F30 320i呢D涡轮四缸机嘅沙哑绝对系两回事。我以前都系玩E36同E46,E36电子野少,狂野好多,太盘好重手,可惜方向机有缺陷,会养水,所以都要经常稳电筒照,一见到距生锈就要即刻换。E46就斯文D,但系绝对吴弱,电子系统多但系防滑系可以熄,距明显重过E36,但系就样样都好平衡,渣过之后都系好难翻转头。买得3系嘅旧车,保养真系要跟到好足先得,同埋E46嘅电脑有好多隐藏功能,检测嘅零件全部都系有关联,例如一只太盘角度传感器坏,可以锁波箱锁引擎,仲会着埋ABS灯,所以检查嘅难度都好高,买部电脑翻黎自己笃系好有必要嘅,如果吴系机件故障,可以自己消故障码,但系如果自己做coding编程,就会有死行车电脑嘅风险。
BM独瘾-------2004年325i(E46) - Ryan  - 粤车无数
 E46系宝马暂时做得最平衡嘅3系,改装会好容易破坏本身嘅机件平衡。不过有要求先至会有进步,尤其系系行走能力方面,基本3系本身已经系去到走火入魔嘅地步,如果想提高,就吴能够话斋换边一个零件咁简单。首先你要知道一D参数,比如合金铃嘅J数同ET,J数越大只铃就越阔,ET越细,只铃就越抛。我之前就拣头尾铃嘅,前面系8J,后面系8.5J,ET拣34就得喇,就算坐落两个人都吴会hi到沙板。避震就拣Bilstein嘅B8,而弹弓我就拣eibach,我之前就无改虾须嘅,因为如果改装粗身嘅防倾杆之后,有可能会整坏车尾副车架,咁或者宜家有新出嘅零件可以改善都吴定,但系当时无。
  评论这张
 
阅读(1058)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017