注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

贵在原创-------2010年积架XF 3.0 V6  

2014-05-29 11:26:22|  分类: 试车日记 |  标签: |举报 |字号 订阅

  下载LOFTER 我的照片书  |
贵在原创-------2010年积架XF 3.0 V6 - Ryan  - 粤车无数
 人人都知道法拉利嘅车外形杀食,但系如果全世界都系用法拉利,咁仲会唔会有好大吸引力?设计嘅功力除左符合审美,最重要都系原创,左抄右抄系无意思嘅。宜家市面上嘅车实在太似样喇,以前就话同厂嘅车似样系想同一家族面口,宜家似乎唔同牌子之间嘅车都越来越似,所以就算几靓几型嘅车,只要条街一多就即刻无晒新鲜感。撞衫仲话可以即刻返去换过件,但系撞车就唔系咁简单,本来啉住试下头啖汤,点知渣出街先发觉原来咁多老襟。讲到特别设计,英国牌子一般都会比到你,尤其系有翻咁上下历史嘅车厂,出D车都会留翻小小野提示你,话比你知距上一代系边只,但系又可以同新出嘅设计融为一体,更加唔会观音头扫把脚,比如呢部2010年嘅积架XF。
贵在原创-------2010年积架XF 3.0 V6 - Ryan  - 粤车无数
 积架嘅中大型经理车以前叫做S-TYPE,宜家叫做XF。当年XF嘅概念车型号叫做C-XF,呢部车之所以震撼,除左将概念车嘅设计比晒你之外,最够胆就系改左积架以前嘅设计。以前嘅积架由入门嘅前驱X-TYPE去到顶级嘅后驱XJ,侧面都系好似一支雪茄咁,主要系卖贵气。XF好明显无中雪茄毒,反而想行跑房车路线,戚眉戚眼虽然好多车都有,不过距就调转黎,所以你见到距其实都系三角形头灯,但系中间就可以用个大圆形突起,连大灯清洗嘅喷嘴都系收系大灯里面,呢个设计唔系个个敢用,事关大灯入水机会会大好多。反光网格大鼻可以话系英国豪华车嘅标志,用系呢D中大型车就最岩喇。虽然头冚无左只加菲猫,但系如果按照XF嘅造型,距栋系度反而核突,为左保留翻小小野性,距系头冚加左几条筋,跟住系沙板开左个窿。头泵把偏斯文,但系你望真D会见到一层层扰流设计,始终积架都算有D战绩,XF点都要有翻D跑车味。
贵在原创-------2010年积架XF 3.0 V6 - Ryan  - 粤车无数
 同好多新出嘅中大型豪华房车一样,XF都系用四门coupe设计,C柱位都系极速下滑尽量连住尾箱盖,所以车尾望过去,无论系尾玻璃定系尾箱盖都好似一部大型GT跑车咁,尾箱盖亦有小小翘起。尾灯就用左类似Aston Martin跑车嘅设计,类似一个拍扁嘅C字形。为左车尾望落扁D,尾灯都特别拉长左,再加埋超肥大嘅尾泵把同双出尾喉,同一部吹胀嘅跑车无分别。
贵在原创-------2010年积架XF 3.0 V6 - Ryan  - 粤车无数
 除左个壳重新设计之外,内笼都系扮概念车。XF最多人知就系熄车嘅时候会收埋冷气出风口同波棍,着车就会反出黎,而旧款积架嘅J字形波棍座唔见左,宜家用左一个类似音响大细声嘅圆形扭制控制。呢部XF属于当年嘅豪华版,但系可能想接地气D,所以用左好多奇怪嘅搭配,比如周围系黑色真皮,但系有D接驳位就用灰色,可能为左想部车跑味重D,又用左好多哑光银色去撞,可能想部车豪D,又唔知系边度稳D木纹饰板翻来砌,所以呢个内笼颜色唔算好高分,唔系话距D料唔靓,只不过觉得有D老土。除左配色神化D之外,细节来讲都做得几好嘅,比如仪表板,都几英国式嘅,白底黑字都好易睇,而指针就整到好似支原子笔咁,不过着车之后就发觉距用左蓝色背光,同中控台个液晶屏幕一样咁蓝。空调功能都好齐,不过控制面板整到好似D洗衣机咁。太盘好多快捷键,左边系免提电话同音乐播放,右边系定速巡航,而且太环偏大,总体来讲距驾驶位周围嘅设计都系好简单,唔会太过反人类。
贵在原创-------2010年积架XF 3.0 V6 - Ryan  - 粤车无数
 中大型车嘅前排一般都唔会太局促,张凳又好坐,只脚又唔使屈起。除左空间同科技配置,同级车好多都系斗造工同用料,XF虽然系新派设计,不过都仲留翻D旧积架嘅味道。比如前排中间储物盒嘅木纹饰板盖,应该系真木黎嘅,噤落去会啪一声,跟住慢慢屈入去,有小小阻尼,里面系杯架。另外仲有副驾驶位前面个柜桶,有粒好骨致嘅圆形制,望落同一粒电子差唔多大,一噤落去,个柜桶仔就会慢慢打开,有时想知道一部车够唔够豪,噤下呢D常用嘅制或者摸下张凳大致都会心中有数,直观感受系模仿唔到嘅。
贵在原创-------2010年积架XF 3.0 V6 - Ryan  - 粤车无数
 同前排比,后排如果坐两个人系好松动嘅,系脚位差D嗟,因为同级对手好多都系特别加长嘅型号,后排空间系无得比。XF同上一代嘅S-TYPE相比,隔音似乎退步左,唔使开好快都会听到后面两只辘有声,以前嘅S-TYPE做得好D。特别提一提呢部车个尾箱,真系好大,但系唔代表可以偷位比后排,因为呢部车尾玻璃真系好斜,按照宜家嘅后排位置,太阳已经差唔多可以晒到个头,如果后排再移后D,唔单只头顶空间无乜,好似寻日咁大热天时40几度,开几大冷气都无用。
贵在原创-------2010年积架XF 3.0 V6 - Ryan  - 粤车无数
如果你用过上一代嘅S-TYPE,就会发觉呢部XF嘅引擎同距副好似,其实唔系似,系一样设计,只不过输出唔同。呢部XF用左一副3.0升V6自然吸气引擎,睇资料有238匹,扭矩接近300牛米,忘记呢D数字啦,因为开起身完全唔觉有咁劲。因为系一部尾辘带动嘅车,所以引擎打竖放,不过你见距盘顶上面嘅入风整成咁,都应该估到系旧式设计,就算系风隔直接索风,都唔可以第一时间入到燃烧室,再加上呢个设计散热好有问题,或者呢个都系旧式积架引擎多野坏嘅原因之一。呢副引擎最特别嘅唔系性能,反而系排气声,着车距系好震嘅,不过如果唔话你听距系V6,你踩踩下会以为自己前面呢副系V8,因为距一样有果只爆裂声,尤其系高转收油,斋听绝对好高分,市面上嘅自然吸气V6好多都无呢把声。因为属于早期型号,距个波箱都仲系用紧一个六前速嘅自动波,唔好睇小距,转波速度系当年嘅纯自动波里面来讲真系算快,升档几快,降档可能有个保护模式稍微慢左小小,而且因为有排气声辅助,会成日觉得部车仲有力冲,不过实际就唔系好冲得,反而油表就好跌得。同引擎偏弱相比,底盘就真系骨格精奇,车架又够晒硬,所以路感都唔会太弱,反而会觉得距好敏捷,不过都唔出奇,因为顶级嘅辣版XF R都系系呢个底盘基础上面变出黎嘅。
贵在原创-------2010年积架XF 3.0 V6 - Ryan  - 粤车无数
 宜家卖紧嘅XF其实并唔系全新设计,虽然笠左XJ份车头落去,仲加多左一副3.0升机械增压引擎同2.0升涡轮增压引擎,但系车架同底盘基本上差唔多,所以顶多算系改款。最后都讲下买旧款积架要注意D乜,二手积架唔算系保值牌子,所以跌价都会好快,通常呢D价位嘅车都系集中几只见惯见熟嘅牌子,一来零件相对会易稳D,二来好多都系充大头鬼,BENZ宝马奥迪凌志一睇就知你有银两系身,不过如果你坐厌左果D,又可以试下呢D,唔易撞款。旧款积架好标榜人手参与整车,安全性能都唔使担心,反而要担心嘅就系电子零件易出问题,呢D同零件本身质素、用车嘅气候环境有关,而且本地改装同维修档口嘅师傅都话呢个牌子系咁嘅,同埋就算系检测电脑,距都有D功能系自己隐藏左,所以有时都要局住翻原厂。
 
  评论这张
 
阅读(361)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017