注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

最乖V6---------2008年凌志IS300   

2014-04-27 08:28:37|  分类: 试车日记 |  标签: |举报 |字号 订阅

  下载LOFTER 我的照片书  |
最乖V6---------2008年凌志IS300 - Ryan  - 粤车无数
作为一部名车,最惨嘅唔系停产,而系新款用紧自己个名但系已经无晒以前嘅实力,甚至变左另外一部车摧毁形象,所以大家拣车就要小心,车名已经唔可以代表以前嘅战绩。为左同宝马3系争饭食,丰田系1998年推出左一部叫做Altezza嘅车,而且分几个型号,一个叫AS200,一个叫AS300,都系用直六机器,而挂凌志标志嘅IS200同IS300就等到1999年先系欧洲出现,北美最迟,等到2000年先有,不过就有四门房车同五门揭背车可以拣。Altezza仲有一个街飞版叫做RS200,用左一副编号3S-GE嘅直四NA机器,马力有210匹,仲用六速棍波波箱,不过净系得日本有得卖。第一代IS系改装界基本上无人唔识,玩扮靓玩甩尾玩斗快饭饭都掂,因为系街车角度来讲,丰田嘅VVT-i真系未必会输比本田嘅VTEC,正正因为咁,系2005年年尾推出嘅第二代IS就好大压力喇,而且当年凌志引进翻日本卖,所以丰田Altezza呢个名亦唔可以继续用,新款亦都无左五门揭背版,一心一意做四门跑房车。
最乖V6---------2008年凌志IS300 - Ryan  - 粤车无数
 呢部系2008年11月份落地嘅IS300,凌志系2006年嘅时候将新车改用一种叫做L-finesse嘅设计,打头阵系四眼仔GS,跟住就到呢一代IS,大致上就系三角眼,车头加厚,车尾收紧,腰线升高,侧面嘅玻璃面积缩细,其实线条就好普通下,但系呢D简单设计往往最襟睇,讲台型讲款式,IS系几靓。
最乖V6---------2008年凌志IS300 - Ryan  - 粤车无数
  IS嘅侧面最有特色就系后面嘅车门,腰线同玻璃之间仲有一件三角形兜起扮跑车。腰线一路拉到去尾箱盖,车尾比较方,尾泵把好短,尾箱盖亦有小小翘起。
最乖V6---------2008年凌志IS300 - Ryan  - 粤车无数
 IS嘅车门唔算好重,但系隔音就好过上一代,而且坐姿都好自然,唔似3系咁低,同同期嘅锐志差唔多。IS300属于高级版本,而且呢部仲系全黑内笼,全黑内笼除左战斗格之外无样好,又易邋遢又吸热,只不过渣紧快车嘅时候当睇距唔到咁解。呢部车嘅设备好多,但系只要你熟丰田车,都可以系好短时间玩掂八成。呢部车个太盘轻手得来又有小小阻力,可惜D皮跣手,摸落又硬,太盘后面有转波拨片,望落都几大只嘅,手细都无问题。
最乖V6---------2008年凌志IS300 - Ryan  - 粤车无数
 无左上一代IS嘅手表形仪表板,要扣D分,因为IS呢个名当初系翻译成智能运动型车,可惜呢一代摆左一个家庭车嘅仪表板落去,反而最新款嘅第三代就唔同喇,只要加D钱,连凌志限量跑车LFA嘅表板设计都可以比到你。中控台依然系凌志密集型设计,全部制都系晒度,哑银色面板同同期ES差唔多,D字都系白色又细粒。既然系丰田家族嘅车,当然会有好丰田式嘅蛇仔档设计,好难明白点解手自一体波箱嘅加减波仲系用前加后减设计,如果真系想有赛车气氛,最好都系前减后加,因为大力踩刹车嘅时候,身体会向前冲,呢个时候退档向前推会更加自然,当你大力踩油加速嘅时候,身体会向后挨,所以向后拉升档会更加自然。
最乖V6---------2008年凌志IS300 - Ryan  - 粤车无数
 豪华房车用真皮座椅好正常,不过系跑房车上面出现就唔系几正常,唔系话凌志嘅真皮座椅唔好坐,坐系几好坐,不过就滑得滞,掟个弯都跣来跣去,所以呢部IS300用左绒面凳真系好醒目,唔理性能系唔系跑车级数,净系呢D凳已经好识挑逗驾驶者,距唔会好硬,而且大比位特登整到突起左,承托力真系唔错。
最乖V6---------2008年凌志IS300 - Ryan  - 粤车无数
 好多人中意渣快车,但系就唔系几中意坐快车,事关前面个人掟来掟去,后面嘅乘客一定系晕到想落车,呢部IS300一样有呢个问题,尤其系后面嘅玻璃好细块,视野又麻麻地。除左晕车浪之外,后排嘅脚位都系好一般,不过为左气氛够统一,后排都同前排一样用左防跣嘅绒面凳。之前有人话IS低ES一等,我反而觉得呢两部车系同级,只不过一部注重舒服享受而另一部注重驾驶感受,两部都属于经理车,问题在于买家心态吾同。
最乖V6---------2008年凌志IS300 - Ryan  - 粤车无数
 IS300属于特定嘅型号,净系得中国、文莱同中东几个地方有得卖,拆走左丰田D-4S直喷系统,最大马力得228匹,用一副丰田6前速自动波波箱,有加减波,后辘驱动。丰田出嘅V6机器大部分都着重中低转嘅发挥,而呢副就有D唔同,中段打后都仲有力冲。如果你中意单手卒太,又唔舍得踩油,距就同一部普通凌志无乜分别,斯斯文文行完一段路,无乜压力,仲好静添,而且波箱识得keep到好低转数,估计呢部车唔会好大食,但系都要食97号汽油。如果你好认真咁渣,距就会比另外一面你睇,呢部车嘅避震唔算硬,过弯都唔算好企,掟左掟右仲会有小小细微震动。虽然唔系超级勤力嘅避震设定,但系就好易估到部车嘅动作,街车嘅避震真系唔需要太硬,乜都硬嘅车就会渣到个人好紧张。总体来讲IS300都几有运动神经,虽然无第一代咁夸,但系行车质素都仲几高级,而且无论开定坐都觉得部车贵气左好多,无以前咁古惑仔。
最乖V6---------2008年凌志IS300 - Ryan  - 粤车无数
 买得一部后驱车,唔理马力扭力大唔大,都应该用后驱嘅渣法,我见好多人买后驱车都系当普通车咁渣,其实有D嘥。同我一齐去试车嘅朋友有时都会问,虽然系尾辘带动,但系始终都系街车,有无必要踩到咁应?如果买部车翻来系纯粹代步嘅话就真系无乜必要,又嘥油又偗胎又伤车又危险,但系如果你欣赏一部车,就自自然然会想知道距嘅实力,又或者咁讲,你日日渣车渣到闷,间中都会飞下车,呢个时候车嘅极限就紧要喇。后驱嘅特性,就系前辘负责转弯,后辘负责驱动,各有各忙,车尾识得走系肯定嘅,如果唔系车厂都唔会研究咁多电子系统去救D舞唔掂后驱车嘅人,不过如果你想研究一部后驱车,最好都系关左距嘅电子系统。要IS300关电子系统都几复杂,同一般车噤制好唔同,距全靠对脚,大致嘅步骤系着车,距个手刹要用脚踩嘅,所以你左脚踩手刹踏板,右脚大力踩两下刹车跟住缩脚,再踩手刹踏板,再踩实刹车唔好放,左脚踩两下手刹踏板,跟住缩脚,再大力踩两下刹车,呢个时候刹车灯会着左,除左ABS之外其他电子系统会关晒,熄车之后就会还原。


 






 

 

 

 


 
  评论这张
 
阅读(379)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017