注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

迷你车-----------2004年MINI Cooper 1.6  

2014-02-07 19:35:15|  分类: 试车日记 |  标签: |举报 |字号 订阅

  下载LOFTER 我的照片书  |

迷你车-----------2004年Mini Cooper 1.6 - Ryan  - 粤车无数

车有好多种,但系由牌子直接代表一种车就好少。比如吉普车,如果以前辈嘅讲法,只要部车系两厢设计、高身、大部而且有四驱,呢种车就叫做吉普车,唔需要特指Jeep呢个牌子,但系如果连牌子都系Jeep,咁就系正宗吉普车,可想而知Jeep嘅形象几成功,自己定义左一类车。除左吉普车之外,仲有一种车都好特别。呢种车特别细部,有现代嘅科技又有复古外形,呢种车除左可以系宵夜档或者酒吧门口见到,又会系会所或者名店城撞到,距系一部可以定义小型车嘅潮车,因为距系一部迷你车。
迷你车-----------2004年Mini Cooper 1.6 - Ryan  - 粤车无数
呢部迷你车系2004年嘅款式,虽然大过上一代好多,不过依然系属于细车。迷你系列里面,呢部系入门型号,所以都无乜高性能嘅外形装点,橙色车身、白色车顶、白色侧镜壳,车头系好扁嘅,最古典就系头灯同中网都捆晒银色边,头泵把都有几条银色设计。部车嘅周围捆左黑色胶边,设计类似依家泛滥嘅Crossover车,有小小越野味道,算系向上一代经典迷你车嘅Rally战绩致敬。
迷你车-----------2004年Mini Cooper 1.6 - Ryan  - 粤车无数
车尾好古典,车顶系平嘅,仲有一条好似遥控车咁嘅天线,所有门窗嘅支撑位都系黑色,所以离远睇车顶就好似悬浮咁,尾挡风玻璃上面有只集成左刹车灯嘅尾翼仔。同车头一样,车尾都系好多银色装饰,两盏车尾灯好怀旧,车里面有粒制,解锁之后先可以系后面打开呢只尾门。
迷你车-----------2004年Mini Cooper 1.6 - Ryan  - 粤车无数
迷你车嘅内笼设计不嬲都系自己中意点就点,无乜特别照顾大众口味,中控台好多零件都系跟翻车身颜色,太盘好多制,连背面都有,两支拨杆都系集成左好多功能。太盘后面就得一个转速表,转速表下面仲有个电子表显示温度,冷气出风口就用左类似中巴冷气出风口咁嘅设计,巨型时速表系中控台中间,下面系音响机头,在下落层就系冷气控制,最下面有一排制好似赛车嘅fuse制,其实系用来控制门窗同雾灯开关嘅。呢部车用一副六前速自动波,有模拟手波嘅加减功能,系D档位置拍去右手边就可以用手波模式,距同同时期嘅宝马自动波波箱一样,手波功能都系推前退档,拉后升档,波棍座前面有两个杯架,而波棍座后面果粒制就用来调教两边侧镜角度。
迷你车-----------2004年Mini Cooper 1.6 - Ryan  - 粤车无数
折起前面张凳,跟住先可以捐入后排,对于我来讲,头顶空间问题唔大,反而系我坐定定之后,前面张凳回位,我只脚就无乜活动空间,后面都有手枕位,不过系硬胶一件,喇叭就系旁边,距套音响都几靓声,冷气就真系麻麻地,我坐后面系咁飙汗,前面两条友就话风凉水冷。 
迷你车-----------2004年Mini Cooper 1.6 - Ryan  - 粤车无数
打开尾门,就会见到一个又浅又细嘅尾箱,尾箱下面无后备车胎,但系就有换胎工具,我记得之前试过一部系有嘅,好似标致206咁装系车底,排气嘅隔离,不过呢部无。尾箱左手边有一个盖,上面有十字符号,里面系一个药包,打开之后有几袋白色绷带。尾箱右手边又有一个盖,打开之后系D电线。 
迷你车-----------2004年Mini Cooper 1.6 - Ryan  - 粤车无数
打开奇形怪状嘅头冚,就会见到复杂而简单嘅引擎设计,简单系因为距系一副1.6自然吸气四缸引擎,复杂系因为距D管路同线路布置,我带左检测电脑,过电脑嘅时候显示进气温度有D偏高。前置引擎嘅车头冚锁一般都系装系龙门架,而呢部就装系大梁前面。呢副引擎维修痕迹好明显,好在无乜渗油,而且踩落都好肯去,呢部车真系要赞一赞波箱,自动波模式好顺,我都有试过2009年打后嘅迷你车,好似呢部旧款嘅反应仲要好D,而且同引擎好夹,手波模式都几好玩,升档慢左小小,退档稍为好小小。唔好睇距细细部,距行起身好扎实架,再加上呢部车个太盘好重,挡风玻璃又企,速度感真系好强,明明睇住个表开紧七八十,硬系觉得实际车速唔止呢个数,再加埋呢部车嘅隔音可以话系无乜隔音,风声引擎声同内笼嘅杂声一齐出动,开心到咩咁,因为咁先系正宗迷你车。 
迷你车-----------2004年Mini Cooper 1.6 - Ryan  - 粤车无数
今年迷你车就会出最新一代,大部左,而且外形好怪鸡嘅,预计之后都会继续迷你车嘅玩法,原装贵价配件一大堆,跟住隔一段时间就出D跑车版、落场版、露营版、行街版、奢侈版,仲有最潮嘅名牌crossover系列、慈善拍卖系列、英国地名纪念系列、战绩纪念系列、周年庆祝系列、整色整水系列等等。好多朋友都中意迷你车,有D会反感迷你车越出越大部,觉得唔够灵活,但系以现时最大部嘅Countryman为例,无论系掟弯、刹车甚至短程再加速,我都觉得好有惊喜,所以唔可以直觉上觉得部车巨型就反应慢,只要保持到迷你车世界级嘅玩乐性,出乜野款式都唔系大问题。
  评论这张
 
阅读(345)| 评论(4)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017