注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

零点一秒后驱-------2013年款IS250  

2013-08-21 15:25:35|  分类: 试车日记 |  标签: |举报 |字号 订阅

  下载LOFTER 我的照片书  |
零点一秒后驱-------2013年款IS250 - Ryan  - 粤车无数
一般家庭车嘅驱动形式大致上分前驱、后驱同四驱三种,三种都有自己嘅优点同缺点,都有自己嘅拥趸,比如你系玩本田嘅,咁实话前驱点点点精准,如果你系渣宝马嘅,实会话后驱点点点过瘾,如果你系养翼豹嘅,实会话四驱点点点稳阵,所以唔同型号、唔同大细嘅车,系驱动形式上面都有自己嘅特点。系以前嘅年代,电子系统未有咁多,呢三种驱动方式嘅性格都会好明显,但系自从汽车电子化之后,距地开起身嘅感觉就开始蒙查查。比如后驱,一般人听到后驱,即刻就会反应话距易甩尾,但系呢D要睇翻引擎嘅马力同路面情况,仲有车胎嘅配搭同悬挂调教,所以唔一定后驱就易甩,就比如今次为大家介绍嘅全新大转款凌志IS250,就系一部非典型后驱。
零点一秒后驱-------2013年款IS250 - Ryan  - 粤车无数
 今次为大家介绍嘅IS250系入门型号,亦都系暂时最平嘅版本。距有新款凌志标志性嘅漏斗形中网,而且电镀描边净系描左上面果部分,下面就跟翻车身喷漆,睇落无咁老土,衬翻距跑房车嘅外形。因为系入门版,所以头泵把两边有雾灯,如果系贵价嘅F-SPORT版本,就无雾灯。头灯系氙气灯,而且距将上一代已经用紧嘅“nike型”日间行车灯抽左出黎,非常之特别。虽然系入门型号,但系都有17寸合金铃,车胎规格系225/45 R17,如果你买顶级版,就会有18寸胎铃。
零点一秒后驱-------2013年款IS250 - Ryan  - 粤车无数
 自从上一代IS用左扁尾灯之后,已经比人话距极度轻佻,但系如果你望埋去呢部新款,你直头觉得距串爆!车尾灯大致上仲系用扁身设计,但系侧面就一直插到落沙板,行近D望直头就系将沙板界开左,睇翻近10年嘅车,真系无一部有距咁大胆。尾灯里面仲有好多“L”字形设计,但系我就觉得呢个车尾太恶,用系一部四门房车上面真系有D离奇,事关IS除左多后生仔买之外,依然有好多行政人员捧场,造型太前卫可能会吓走一部分客。尾泵把摆明要衬翻尾灯线条,连反光片都要整到起晒角,再配埋尾箱盖突起嘅尾翼线条同双出尾喉,如果呢部系跑车咁就真系靓到绝。
零点一秒后驱-------2013年款IS250 - Ryan  - 粤车无数
凌志之所以受欢迎,最初唔系因为距襟玩,而系因为距嘅设计符合大部分亚洲人,无论系座椅定按键控制界面,都系极之易上手,呢部入门版无全皮座椅,距系半皮座椅,坐嘅部分同挨嘅部分系布,我以前都好中意全皮座椅,但系如果部车系停车场晒过之后,真皮座椅会特别热,成个内笼都特别热,所以我宜家开始中意半皮座椅,起码无咁热。
零点一秒后驱-------2013年款IS250 - Ryan  - 粤车无数
 新款IS嘅视野都几好,两边侧镜嘅盲区都唔算好大,但系坐姿稍为高左D,可能系我开惯D矮嘅车,坐得高我会觉得好唔稳阵。我大致讲讲呢部入门版有D乜嘢装备,距有电子助力太盘不过要手动调整前后上下,手刹同ES一样都系用脚踩,座椅都系手动调整,前后车窗都有防夹功能,侧镜系电动而且有加热功能,有自动感应嘅大灯,可以调教角度同自动清洗,有双区自动恒温冷气,音响有8个喇叭,有倒车雷达同胎压监测功能,有蓝牙电话同一键挞车,有8个气囊同一大抽电子安全系统。波箱继续用上一代嘅六前速自动波,有模拟手波功能,太盘有转波拨片,波棍都可以拍前拍后转波,波棍右边有转盘可以控制液晶屏,而且有几粒快捷键,而波棍后面嘅转盘系控制行车模式,有ECO悭油模式、NORMAL一般模式同SPORT运动模式,后面仲有两粒制,一粒系关闭防滑系统,一粒系SNOW雪地模式。
零点一秒后驱-------2013年款IS250 - Ryan  - 粤车无数
我知道好多朋友都有睇过介绍新款IS嘅视频,会见到果个LFA跑车移植过来嘅仪表板,中间呢个圆圈会根据你嘅设定左右移位,跟住连同旁边空位显示唔同内容,其实如果你玩惯智能手机,会见到好多软件嘅UI都系咁设计,可以系一个有限嘅空间显示尽量多资讯。如果你要呢个仪表板,咁就要买F-SPORT版本,如果系入门型号,就系固定式嘅仪表板。系度我讲讲买车嘅问题,宜家嘅车基本上都有一到两张配置单,有标准配置,有选装配置,但系呢D野系咪你想要嘅呢?你会唔会为左一刹那嘅冲动而比钱买一堆好快就玩厌嘅野呢?以呢部新款IS为例,如果你唔需要呢D花巧电子功能,我觉得买入门型号或者再装只导航就已经差唔多喇,开车都系专心D好。
零点一秒后驱-------2013年款IS250 - Ryan  - 粤车无数
今代IS250长过上一代大概8公分,而轴距就多左大约7公分,不过后排空间都系岩岩好。后排有冷气出风口,而且最有惊喜系今代IS座椅嘅承托力,就算系入门型号都有顶级版嘅质素,而且如果你用过上一代IS,你会发觉今代后排真系阔落左D,上一代IS后排实在太局促。其实要系凌志系列里面稳一只又好砌又舒服嘅型号真系好难,睇落部部都好似得但其实开起身真系未够火候,所以先会有IS出现,但系依家IS整整下又唔系玩绝对操控感觉,距依然系卖舒服同宁静,只不过稍微好飞过其他凌志小小。
零点一秒后驱-------2013年款IS250 - Ryan  - 粤车无数
以前我好少留意车尾箱空间,但系自从踩单车锻炼之后,我就觉得部车可以装得落部单车系几咁实际。新款IS嘅尾箱空间唔算好大,但系胜在够归位,无乜三尖八角位突出黎阻头阻势,而且后排可以拍低,方便车D长形物件,不过呢个通道嘅入口系椭圆形,如果系方形应该更加好。揭开尾箱地台嘅隔板,就会见到备胎同换胎架撑,呢个备胎唔系标准尺寸,换左之后最好快D去补胎或者买条新胎,因为呢D简装备胎系比你应急,而唔系代替标准车胎长期行。
零点一秒后驱-------2013年款IS250 - Ryan  - 粤车无数
 呢副引擎同上一代IS250嘅引擎系一样嘅,一样系V6布局,每个气缸有4个气门,压缩比去到12:1,要食97#油,最大马力208匹,最大扭力25.6公斤米,一样系前置引擎后辘驱动。今代IS250重过旧款大概40公斤,所以慢速行嘅时候会大食D,但系都唔会好明显,大概都系一升油行11公里咁上下。可能你会问呢部车大改款点解仲用旧引擎,其实旧款引擎唔一定唔好,最起码你唔使做白老鼠。呢副引擎胜在悭油同维修保养方便,而且距唔一定要用正厂零件,最重要就系距同果副六速手自一体波箱配合得几好,所以距系一副几成熟嘅引擎,咪话今代用,下一代继续用都有可能。不过呢副引擎系新嘅IS上面有小小修改,第一系噪音,好明显静过旧款,但系又有可能系新车嘅隔音好过以前,第二就系距嘅加速顺过以前,连之前已经好轻微嘅波箱动作宜家都好虚无。宜家丰田出比凌志系列用嘅2.5升引擎有两种,一种系IS用惯嘅六缸机,一种系新款ES嘅四缸机,虽然大家都系2.5,不过踩油反应绝对系两个世界,多左两个气缸,引擎嘅转数上落都会勤力D,而且玩开跑房车嘅朋友都会觉得尾辘驱动嘅车同六缸引擎系绝配,但系又可能唔系个个人都开得出同四缸后驱车有乜嘢唔同,因为宜家嘅新款跑房车都加入好多电子科技,尤其系呢部IS250,虽然都有前双摇臂后多连杆悬挂,但系就算你点逼距,距最多都系车尾摆一摆,然之后所有电子系统就开始做野,唔再喷油,甚至波箱都唔会帮你减档,即系话你觉得距系后驱嘅时间,就只有电子系统发力之前嘅零点一秒。
零点一秒后驱-------2013年款IS250 - Ryan  - 粤车无数
讲亲凌志嘅车点都要提下性价比,一路以来IS都系追住宝马3系、奔驰C级同奥迪A4黎打,虽然牌子唔够距地响,但系讲到襟捱呢方面真系一D都唔输蚀,而且以广东人角度去睇凌志,都会觉得距好实际,第一第二代主要输系豪华设备同后排空间,今代新款好明显追翻上黎,但系操控感觉又比人拉开左。宜家买车嘅人同以前好唔同,以前好多都系隔山买牛,单凭一本画册甚至老友一句话正就走去落订,但系宜家D人唔会,好多都会做足功课睇好多资料再去试车,试完再返去睇,睇完再去试,以呢类型车为例,我觉得真系唔洗介意买前驱定后驱,第一,距唔系D乜嘢大马力跑车,就算比后驱你而且拆走防滑系统都未必做到D1比赛咁嘅甩尾效果,如果系单纯想试下后驱甩尾,可以参加试驾会体验下,因为到你买部车翻来又未必舍得罗去甩;第二,呢类型嘅车就算几跑得,都依然会兼顾后排,因为距系一部四门车,唔会有好极端嘅跑车感觉比到你,所以拣呢类型嘅车最好都系以维修保养方便、好开好用为大前提。

 

 

 

 
  评论这张
 
阅读(470)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017