注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

浓缩豪华--------A160(W168)  

2013-05-21 12:20:41|  分类: 试车日记 |  标签: |举报 |字号 订阅

  下载LOFTER 我的照片书  |
浓缩豪华--------A160(W168) - Ryan  - Ryan粤语车评
红色、蓝色、墨绿色,翻左黎桂城做野已经有四年时间,都系见过三部旧款A仔,而自从今年买左呢部天蓝色A仔之后,我都无系桂城见到有其他人开。呢部A160代号W168,系2001年制造,但系就2002年落地,听讲当年呢部车要三十几万,而今年5月份距岩岩过完11岁仔生日,就值区区五皮野。我五一放假去左白云车展,我见到有部白色嘅新款A仔写住“已售”,车价好似25万几,如果同旧款A仔比较,事实系平左,你啉下2002年30万同宜家嘅30万根本唔同概念,当时30万可以买层楼,而宜家30万只能够买个厅,而且新款A仔同之前两代已经行唔同路线,虽然新潮,但系就唔够豪。宜家开始多人开德国车仔,贪距细细部易控制有品味,而且好多车厂都话自己有出“精品车仔”,标榜细车都有大车嘅豪华气氛,我都去睇过几部,但系翻黎睇翻呢部旧款A仔,我就觉得距地果D根本唔系叫做豪。
浓缩豪华--------A160(W168) - Ryan  - Ryan粤语车评
当年嘅BENZ家庭车仲系好中意将LOGO栋系车头冚上面,而A仔就统一用大大个BENZ标志吸系个中网度,同BENZ跑车一样咁有睇头,上下两条反光条我迟早都刮走距,因为我觉得稍为有小小跑车味嘅车都唔应该有呢D反光条。A仔嘅头灯系分层设计,夜晚睇落会靓D,头泵把两边有突出防刮花设计,而下面都系散热口,虽然两边可以加装雾灯,不过装左未必好睇。
浓缩豪华--------A160(W168) - Ryan  - Ryan粤语车评
A仔车头好短,头冚同挡风玻璃基本上系一条线,侧面睇就同一个岩岩蒸熟嘅馒头差唔多。宜家嘅细车一般都用两厢设计,而A仔系属于单厢设计,就好似微型MPV咁,距只前门好大,但系后门就好窄,比例有D怪,不过后面有两只相反方向嘅三角形细窗,令到呢部车设计感好强。另外,呢部车系用左BENZ发明嘅三文治式车架,万一正面同人地硬撼,引擎波箱都会顺著两条轨道滑去司机位下面,所以你会觉得部车好高身,高车身同相对窄嘅车身阔度过弯自然输蚀D,所以为左安全,距有防滑电子系统,而且用左16寸阔胎铃,有姿势有实际。
浓缩豪华--------A160(W168) - Ryan  - Ryan粤语车评
同时期嘅BENZ好中意用类似嘅尾灯设计,比如R170时期嘅SLK,W203时期嘅C仔,甚至W220时期嘅S级都系咁,红色框,中间两条白线,简单又清楚,虽然唔系宜家最in嘅LED设计,但系质感会更加厚实。豪华车另外一个特点就系车尾都会好厚重,虽然A仔细细粒,但系车尾一样有大佬级设计,特别向后同向下伸长,令到人觉得距虽然细,但系绝对唔轻。
浓缩豪华--------A160(W168) - Ryan  - Ryan粤语车评
A仔另外一个吸引我嘅地方就系呢个风琴顶,距打开果阵会一件件排住队踏埋一齐,好似风琴咁。其实你见到A仔D窗全部都大大件,系里面唔会觉得唔够光,但系天气好嘅时候你开埋呢个天窗,就会有唔同感受,成个车顶无左嘅感觉,真系复古。
浓缩豪华--------A160(W168) - Ryan  - Ryan粤语车评
早排有好多关于国产BENZ有味嘅报道,只能够话一分钱一分货,我呢部都有,不过好轻微,同我其他几部旧款BENZ只味差唔多,而且颜色一睇就知道系加工过,我之前系广州三元里见过一部同款A仔,里面D皮系灰色,而我呢部系蓝色,摸落好厚,而且好软熟,中控台全部都系皮,不过我觉得个太盘可能唔系皮,有坐过早期S级嘅朋友应该记得,座椅都系咁嘅色,有D会偏绿色,有D系好似呢只咁偏蓝色,踩油踏板虽然唔系BENZ地台式设计,但系更加易用,而刹车就偏硬。另外,BENZ好中意系太盘左手边放两支拨杆,一般车系左右各一支,呢样野要D时间适应。呢张老土坐垫唔系我放上去嘅,因为我觉得,既然用得真皮座椅,就唔好用坐垫。
浓缩豪华--------A160(W168) - Ryan  - Ryan粤语车评
中控台呢个波浪形设计系成部车最后生嘅地方,椭圆形出风口好似异形,太盘好简单,得喇叭同气囊,但系中控台就复杂D,而且D制仲系以前八九十年代BENZ设计,呢D按键虽然老土,但系极之好用,大大粒,啪啪声。音响界面都几靓,两边系十字星按键,防盗系统开嘅时候有盏红色灯会闪闪下,但系D字太细粒喇,下面系换碟CD机,再下面先系冷气控制,中控台用左桃木装饰,真系好唔惯。
浓缩豪华--------A160(W168) - Ryan  - Ryan粤语车评
我发觉BENZ嘅仪表板都好中意整大大个时速表,而转速表就缩埋系一二角,油表又系超大,但系就唔见左水温表,但系只要接电之后,中间个细屏幕就多野睇喇,有保养记录同温度,都好易明。
 浓缩豪华--------A160(W168) - Ryan  - Ryan粤语车评
另外一个旧时代设计,就系上落窗按键放系前排座椅中间,上面仲有一个储物箱,所以用起身超级唔方便,仲未够架,一路向后仲有按键,问你死未!成部车最cheap就系个手刹,都唔知似乜。2000年之后,BENZ开始用呢个有加减波功能嘅自动波,除左PRND之外,W系湿地模式,S系运动模式,D波左右有加减波控制,只要将支波棍拍左拍右就得喇,认真古怪。 
浓缩豪华--------A160(W168) - Ryan  - Ryan粤语车评
因为准备洗车,所以要清晒D杂物先,A仔后排唔算阔落,但系胜在楼底够高,张真皮凳又够厚实,质素完全抛离宜家热卖嘅中小型房车几条街,唯独系上落窗按键太山寨喇,好似另外加装嘅咁。成个后排最满意都系张凳,虽然有D刮花,但系一D裂纹都无,而且坐落真系好接近顶级沙发,11年车龄喇,BENZ系呢方面真系无得弹。
浓缩豪华--------A160(W168) - Ryan  - Ryan粤语车评
你无眼花,呢部的确系一部买送车,我知道好多买BENZ嘅人唔会咁用,不过我地留意两样野就得喇,第一,距有尾箱,第二,距空间够。车系要来用嘅,同一间屋一样,你比左钱,D空间你唔舍得用?唔好咁介意啦,空间唔用就无意义。A仔后面储物空间大致上就系咁,不过为左保护丝绒嘅内饰,我加左两个胶盒系下面垫住,咁就唔会怕整湿。
浓缩豪华--------A160(W168) - Ryan  - Ryan粤语车评
特别讲讲储物呢方面,除左有两厢车都有嘅隔板之外,呢个隔板都系包左丝绒嘅,一般你见到嘅就得件塑胶板,另外,两边都有储物格,右边呢个系药箱,但系里面个药包我就摆左系左边。我都未打开过距,稳日睇下德国进口嘅药系点嘅先。BENZ一般都会放个呢D药包系车里面,有D系放尾箱,而有D会摆系凳底,宜家好多车都话自己对司机乘客有几照顾,但系连个药箱都唔比人,未免太搞笑喇。
浓缩豪华--------A160(W168) - Ryan  - Ryan粤语车评
呢部车用一副1.6升自然吸气四缸汽油偈,最大马力102匹,每缸两气门设计,前偈前驱,刹车就用前碟后鼓,除左刹车脚感偏硬之外,暂时都唔觉得距唔够收,另外,呢部车排气声好沉实,我初头以为距改装左尾段,但系换机油升高部车睇,距又确实系原装尾喉,排气声浪系引擎2000到3000转之间最沉实,一过3000转就声都沙埋,毕竟系八气门设计,高转速唔系好够气,但系低转速扭力都唔错,起码无拉牛上树咁惨,开呢部车都系温柔D好,零到一百无认真测试过,因为呢几日都无试过高速,最开心系冷气够冻,张凳确实好坐。浓缩豪华--------A160(W168) - Ryan  - Ryan粤语车评
对于欧洲车仔,我承认系有小小情意结,我有部01年嘅别克赛欧,行左26万公里喇,平时用来上落班,呢部车原型车系欧宝CORSA,同呢部A仔一样都系德国血统,可惜大部分人见到距个别克标志都话系美国车。A仔嘅底盘反应同赛欧仔几似,慢速会觉得好沉实,高速一样都系好定,油耗都差唔多,200蚊93#汽油都可以行到300公里。两部车最大分别系冷气同空间感,其实开呢D欧洲车仔,我觉得唔好太介意马力,讲得难听D呢两部车加埋都唔够200匹,但系讲到手感真系唔差,首先呢两部车都无乜嘢坏,第二,有种安定感,呢种安定感我曾经以为系部车唔够力,但系一路用落我就唔系咁睇,系设计嘅问题,同级别嘅新款车虽然快,但系已经无左呢种安定感,由你开门、上车、关门、揽安全带、挞着部车、起步、加速、刹车、打灯、转弯、停车,到最后停入车库,呢种安定感一路都有,我完全唔觉得有压力,可以有更多注意力摆系路面情况。旧车唔一定差,虽然技术唔够先进、款式唔够潮,但系开车始终都系讲气氛、讲感觉,开呢D车我会觉得好有信心开快,而且系不知不觉间开得快,我成日都出入南国桃园,去过嘅朋友都会记得果度除左弯角似赛车场之外,仲有高低落差,呢两部车系果度表现都唔错,当然速度唔系好快,但系我觉得驾驶乐趣唔关速度事,大部分系关心情事,就好似影相咁,相机唔需要最好,心情最紧要。 
 
  评论这张
 
阅读(559)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017