注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

六速棍王------------2013福特Focus ST  

2013-11-04 15:58:08|  分类: 试车日记 |  标签: |举报 |字号 订阅

  下载LOFTER 我的照片书  |
六速棍王------------2013福特Foucs ST - Ryan  - 粤车无数
 自从第六代GOLF GTI国产之后,同价位要稳个对手都好难,再加上距有实用五门揭背格局,又有当时好潮嘅2.0升TURBO偈配6速孖极力子波箱,样样野都好似好岩用,而且样样野都好够用,所以都好难怪有一大班GTI拥趸。不过宜家唔同讲法喇,事关Focus ST黎左,进口车,比利时装嵌,一样有2.0升TURBO偈,独孤一味六速棍波,属于试探驾驶技术嘅车,亦都系锻炼驾驶技术嘅车,事关你渣自动波,有电脑帮你计好晒数,再加上宜家新款车嘅电脑都好醒目,点踩都唔会chok下chok下,棍波就唔同,你缩油缩快D个车头都即刻钟下钟下,有几多斤两,即管渣架棍波出黎睇下。
六速棍王------------2013福特Foucs ST - Ryan  - 粤车无数
 今代嘅Focus外形同上一代好唔同,无论系之前试过嘅普通版,定系呢部辣版,我见过有人渣橙黄色嘅ST,唔知系咪车头线条太多,觉得怪怪地,但系黑色就唔同喇,可以收埋D线条,望落简单得多。不过我就觉得外形从来都系各花入各眼,而且我坐系里面又睇唔到,作为一个驾驶者,我净系会留意内笼设备就唔就手,张凳好唔好坐,视野好唔好,其他野我好少理。
六速棍王------------2013福特Foucs ST - Ryan  - 粤车无数
 虽然系新设计嘅车,但系距个侧面同车尾都无乜特别嘅线条,除左盏国际手势嘅尾灯,就系一个几垂直嘅车尾,部车感觉上好干净企理。今代好明显系装工上面进步左,车身沙板之间都好细致,一D都唔差。网上好多人话中间双出尾喉点靓点靓,我无乜感觉,我净系觉得部车排气声几好听。
六速棍王------------2013福特Foucs ST - Ryan  - 粤车无数
 凡系引擎打横放嘅头辘车,因为引擎波箱摆晒系车头,波箱出黎嘅传动轴就会一边长一边短,你比油一般都会抢太,尤其系大马力大扭力嘅头辘车,抢得仲劲,今代Focus话有新设计尽量令到距唔好抢得咁犀利,不过都仲系会抢。仪表板设计唔系好靓,不过就有好多资讯显示,睇到你眼花。不过最得意就系仪表板会建议你用乜嘢档位,比如行紧60,用紧三档,距会叫你入四档,入完四档距又话你知可以入五档,可能系想你渣得悭油D,我觉得呢个功能几好。太盘有前后高低调教,三个脚踏整得几靓,但系刹车同油门离得远D,如果拍埋D就更加好喇。
六速棍王------------2013福特Foucs ST - Ryan  - 粤车无数
 Focus ST嘅内笼唔算好另类,事关宜家内笼新奇嘅车大把,而且呢部辣版要照顾埋同厂嘅普通Focus,所以内笼都唔会特别处理。因为系一架TURBO车,所以系中控台上面有TURBO嘅Bar数表、机油温度表同机油压力表。张凳真系几正,虽然唔系电动调教,但系几好坐,两边侧面又够包身,坐耐D都唔会觉得腰骨痛,我觉得坐姿系好重要嘅,如果你坐得唔好系无办法渣得好嘅,我渣过上一代普通版嘅Focus,当时嘅五前速棍波已经好好,估唔到今代辣版嘅六速更加正,入档好准,而且无乜杂音。
六速棍王------------2013福特Foucs ST - Ryan  - 粤车无数
 呢架车渣起身算系几静,部车就算掟来掟去都无乜杂声,尤其系同GOLF GTI比,呢部好D,而且距车架好扎实,唔知系咪因为系比利时装嵌,硬系觉得距有小小似德国车。呢部车甚至讲紧呢类型车,都唔系好注重后排,坐垫又薄,椅背又企,有乜理由会坐得舒服呢,所以买得呢D车应该都系一味自己爽,事关距真系几好渣,原装避震又唔会太硬。
六速棍王------------2013福特Foucs ST - Ryan  - 粤车无数
 尾箱无乜三尖八角,后排可以四六分,望落好实用。另外要赞一赞呢部车嘅车尾,事关部车就来要推头嘅时候,个车尾会走出黎跟翻住,呢样野应该同原装嘅避震设定有关,避震唔算好硬,车身过弯会摆得多D,车身识得摆有好有唔好,唔好就系部车一路摆,抓地力会慢慢减低,而好处就系你好容易feel到架车,距想做乜你都可以第一时间知。呢部车就系咁,一推头,车尾就跟,再推,车尾再跟,总之就唔会一路推落去,咁你就会好好奇,想知道如果再踩快D部车会点。调教呢部车嘅工程师真系好聪明,距可以样样野都配合得到,而且个防滑系统都整到好有人性,而且唔洗好高速就试得出,部车只要一侧,车尾就会走出黎,你等多阵车尾再出D,你就踩尽,咁就会好自然行翻出弯。
六速棍王------------2013福特Foucs ST - Ryan  - 粤车无数
 呢副引擎只要千几二千转就已经有扭力涌出黎,笃小小油就已经好肯去,缩油再翻脚油都无问题,就算谷到上五千几转都依然会涌出黎,再加上部车好定,可惜太盘嘅路面感就少D,好明显系比D野过滤左,但系都唔算差。再渣快D,就发觉部车嘅太感几好,好稳阵,起码唔会突然之间弹你只手,不过呢D都系可以调,因为距系用电子太,可以用电脑程式去调教力度,呢部车应该系有力度变化嘅,即系渣得慢或者泊车就轻,渣得快就重,可以调教固之然好,但系如果调得多左就会觉得太感假D。另外讲讲呢D大扭力头辘车嘅渣法,好多人都系直路尾刹到尽,跟住入弯,其实你可以试下第二样,比如系直路尾你唔好刹得咁死,跟住尽量和住油过弯,事关呢D头辘车本身车头重,如果你再踩死架车,两条头胎会好辛苦,呢个时候反而系无乜抓地力,不过睇下系要过D乜嘢弯,我同你讲另外一种方法都系想你多个选择。呢部车嘅防滑系统系可以熄嘅,熄左之后你再用同一个车速入弯,你会发觉头辘好早响,而且抢太抢到咩咁,条胎一路叫一路入弯,车尾继续跟,居然可以将一部头辘车调教到唔似头辘车,的确好神奇。
六速棍王------------2013福特Foucs ST - Ryan  - 粤车无数
 呢部车用左头麦花臣后多连杆嘅悬挂,有18寸胎铃,车胎系固特异嘅Eagle F1,呢款胎出左好耐喇,唔系咁咬地,渣快小小就开始推头,如果你系中意玩头辘驱动嘅车想距啜地D,就要换套好D嘅胎。呢部车系无LSD嘅,过弯完全系靠防滑系统帮手,原理都好简单,因为入弯嘅时候,头辘两边嘅转速肯定要唔同,比如转右,右前辘要转得慢D,左前辘要转得快D,呢个时候电脑就会用刹车拖慢右边车辘,而且会收油,咁就可以有差速器嘅效果。如果无差速器呢,个右前辘就会跳起,跳辘唔系话架车好野啊,你想快一定系四个车辘都系地面先得架。Focus ST嘅电子差速器其实同ABS有关,大家都知道宜家嘅车都会装ABS,有ABS嘅车一定会有车辘速度感应器,收集到数据之后就会交比电脑处理,睇下每个车辘比几多刹车力度,做到限滑差速嘅效果,第时应该会越来越多车有呢个功能。如果讲习惯甚至讲好用,我都系觉得机械式好用D,事关机械式差速器里面齿轮嘅角度,可以决定到所谓嘅1way,2way甚至1.5way几种唔同嘅限滑效果,但系点解仲要试呢D有电子差速功能嘅车呢?因为时代唔同左,科技进步左,以前我地见惯用惯嘅机械式差速器,以后可能都会慢慢比呢D电子差速代替,所以我地都要了解下,唔系话一部辣车就一定要纯机械,宜家亦都好难买到纯机械嘅街车,你睇下,几多车用紧电子太、电子油门、电子避震,宜家连差速都用埋电子,所以你第日想买翻部有翻咁上下力水,仲要系封油太,甚至无助力太,又系拉线油门嘅车,真系好难。今代Focus ST系国际车坛系好有地位嘅,无论系价钱、装嵌、用途,仲有最紧要嘅操控性,距都好高分。虽然距D装备望落无乜特别,无LSD又无偷轻,不过距副引擎真系唔错,有250匹,唔算好大力但系绝对唔算慢,又肯转,同波箱又衬到绝,你买翻来只要换套好D嘅胎甚至落套再靓D嘅避震已经好够砌。
  评论这张
 
阅读(475)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017