注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 
 
 

马房怪鸡--------宝马X1 20i  

2012-10-31 22:14:19|  分类: 试车日记 |  标签: |举报 |字号 订阅

  下载LOFTER 我的照片书  |
马房怪鸡--------宝马X1 20i - Ryan  - Ryan粤语车评
依家呢个社会好讲求速度,所以车厂出新车嘅频率就来拍得住D手机出新款。打开报纸杂志,你以为自己睇紧武侠片,系都要分个高低嘅,两款车都咁好唔得嘅,你部车下下对住我部来打,仲话秒杀乜乜车乜乜款,你玩晒啦,我要出部还拖!我依家就秒杀你,仲要秒杀埋你全车系添!问你死未!唉,冤冤相报何时了呢?最紧要都系你唔好比呢D广告影响,钱系你手上,要啉清啉楚。比如依家大热嘅SUV潮流,贪距大件阔落好用,于是细码、中码、大码、加大码甚至加加大码嘅SUV都有人去抢,但系买左翻去先发觉,原来一年到尾都系你自己一支公系度开,最多搭一个人,后排可能都无乜坐人,然后你对照翻换车之前嘅油费同保险费,先发觉原来换左SUV之后你洗多左好多冤枉钱。买车唔好贪大,唔好贪新款,要睇下依家停车位系几咁紧张,条路系几咁塞,D油系几咁贵,而且唔好斋买外形,要留意下距嘅馅,要买果间车厂里面最出名嘅型号,唔好人买你又买,就好似今次嘅主角------宝马X1咁。
马房怪鸡--------宝马X1 20i - Ryan  - Ryan粤语车评
进口嘅X1其实2009年已经有得卖,而国产嘅X1就系今年先有。呢部系入门版对上一级,全名叫做X1 sDrive 20i。X1嘅外形可能你仲熟过我,因为佛山呢边唔系好多,X5,X6反而仲多D。外形方面X1头灯几好睇,尤其条灯眉,好过X3果盏畸形头灯多多声,不过就用左类似X3嘅“暗疮”型雾灯,而突鼻中网就同新款宝马差唔多,一件过装埋入头泵把,中网下面即刻就有大范围黑色围住车牌架,头唇位置就专登用哑光银色,本来斋用黑色胶嘅话会显得部车野性D,有D踩界味,但系加左银色,好似有D多余。
马房怪鸡--------宝马X1 20i - Ryan  - Ryan粤语车评
同好多踩界车一样,X1四周围都围左一圈黑色嘅包围,其实又唔可以话系围上去,因为本身就已经嵌入左包围,只不过系用左双色设计,睇起身系撞色。尾泵把下面又试有一条银色,我其实好反感一部车有超过两种颜色,尤其系呢D休闲车,D色一多,部车就cheap晒。另外都提一提距嘅胎铃,四条合金铃都系用225/50 R16嘅车胎,用系呢部车上面有D细。X1侧面有条好深嘅折线,由前面沙板一路拉到去尾灯,呢样都同好多新款宝马差唔多,以前认宝马要认中网,其实依家新款嘅宝马只要系你隔离行过,你都基本上可以认得出。 
马房怪鸡--------宝马X1 20i - Ryan  - Ryan粤语车评
打开只车门,你可以见到车门上高隔音条唔多,你如果啉住买呢部车翻去记得要出去加装。呢部车前排嘅空间都OK,同部普通嘅四门3系房车差唔多,闻落阵味都系差唔多,应该用料都系差唔多。呢部车内笼系米色,不过你订车果阵可以订黑色,玩呢D稍微有小小运动feel嘅车,黑色内笼唔止襟睇,望落去都会比较襟邋遢。
马房怪鸡--------宝马X1 20i - Ryan  - Ryan粤语车评
坐落之后,你会发觉呢部车其实都几怪架,系出面睇落去牛龟咁大,点知入到来真系有D唔妥,一般买SUV嘅朋友一定会比距嘅外形厄到,以为距里面都会好阔落,其实唔系,甚至连头顶空间都唔算好多,总之你坐入来唯一觉得距同一般房车唔同,就系视野高D,两只侧镜大D,系咁嘅姐。另外仲有一样野我觉得几奇怪就系副驾前面嘅柜桶,上面个拉手同柜桶系唔同色嘅,好似求其拼装咁。系度我简单讲讲呢部车有D乜嘢装备,呢部车系全系列比较中间嘅型号,对落系18i,对上系28i,呢部20i有车顶行李架,全车防夹电动窗,自动感应雨刮,可以记忆同加热嘅电动侧镜,自动感应嘅氙气头灯带清洗功能,手动调角度嘅多功能真皮太盘,一键着车,有两段记忆同电动调教嘅真皮座椅,儿童座椅链接口,可以外接音源嘅6碟CD,7个喇叭,双区自动恒温冷气,胎压检测,前后泊车感应,而安全系统就有三合一刹车,电子防盗,引擎防盗,前面侧面一共4个气袋、4个气帘,基本上应有尽有。介绍新车之所以讲呢D配置唔系帮人卖广告,系等你第时买呢部车嘅二手车果阵,可以参考下,睇下原装系点,有无比人改装过,因为欧洲车如果比人改过电路,要查翻就会几烦。
马房怪鸡--------宝马X1 20i - Ryan  - Ryan粤语车评
唔使怕喔,X1就算后排几细,都够地方比你放脚嘅,不过要留意嘅系距后排呢张几薄嘅座垫,比好多细车嘅座垫都薄,而且因为部车车底要行传动轴,后排中间突起,呢部车后排都系坐两个人会好D咯,不过座垫又薄,而且大比位唔够长,长时间坐可能会攰D。为左令到你唔觉得X1后排局促,X1全系列无论边个型号都会有个大大嘅全景天窗,对于呢个牌子呢个价位嘅车,算系咁喇。
马房怪鸡--------宝马X1 20i - Ryan  - Ryan粤语车评
其实SUV都可以勉强属于揭背车,分别在于睇下只尾门系点揭法姐,X1后排可以三张分别拍低,呢个设计几好,不过后面嘅空间同埋同尺码嘅揭背车差唔多,两边放左D工具,个网兜几好用,揭开底板下面系电池,而且呢部车系无备胎嘅。系度我都系想建议下,如果你系一心想买部空间大D嘅车用,不妨再考虑下买部房车底盘嘅旅行车,因为呢部X1真系无乜大空间,而且一D旅行车嘅空间都大过距,而且外形都唔错,所以如果你需要部车操控性好、空间大,买部旅行车都OK,唔一定要稳X1。
马房怪鸡--------宝马X1 20i - Ryan  - Ryan粤语车评
国产嘅X1清一色都系2.0升四缸引擎,分别就在于18i无涡轮机,而28i嘅增压值大过20i。呢部20i用嘅系一副代号N20B20A嘅涡轮增压引擎,压缩比10:1,要食97号汽油,最大马力184匹,最大扭力有270牛米,排放属于国四标准。宝马四缸引擎向来都系的的色色,再加上引擎向后移,所以引擎到龙门架仲有好多空位,另外你见到原装龙门架系黑色,而部车车身系红色,第日见到距嘅二手车唔好一口咬定系拆过,因为原装就系唔同色。呢副引擎嘅扭力早系1300转左右就开始来料,冲到4500转先开始跌,系城市用就最岩喇。呢部车重大约1吨6,零到一百7秒7,再加上部车有个8前速自动波箱,就算行紧时速80公里,转速都系1400左右,油缸有63升,加满一缸油有排你开。
马房怪鸡--------宝马X1 20i - Ryan  - Ryan粤语车评
唔好以为大大部SUV就一定系四驱先得架,宝马X1嘅S Drive就系后驱,要买到写住X Drive先系四驱架。呢部车我觉得只能够话系易开,距唔算好笨重嘅SUV,睇位变线甚至停车无乜问题,最大问题系跑高速嘅风声有D大,所以点解我叫你买翻去自己装D车门密封条,距嘅隔音同3系根本无得比。X1系后驱SUV,不过车身都唔过1米6,所以惯性唔会好夸张,呢副引擎虽然得两升排量,但系平时用都够晒,8速波箱又够悭油,但系唯独配置都系寡D,其实多个显示屏都好吖,毕竟系高身嘅车,装个倒车影像对新手泊车好有帮助,要潮要型可以,但系唔可以寒酸。如果你问我X1抵唔抵买,我觉得一般,事关我对SUV无乜兴趣,而且我都系一两个人用车比较多,买SUV有几迫切我暂时体会唔到,但系我都系重复一句,啉清楚你要乜车,先好去落订。
 
 
 
 
 
 
  评论这张
 
阅读(520)| 评论(2)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017