注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

虫新开始-------甲虫1.2 TSI  

2012-10-13 21:26:37|  分类: 试车日记 |  标签: |举报 |字号 订阅

  下载LOFTER 我的照片书  |
虫新开始-------甲虫1.2 TSI - Ryan  - Ryan粤语车评
如果以呢个角度望新甲虫,你会以为自己望住部911波子。甲虫车系世界上最经典嘅款式之一,咩叫经典呢?成世都唔变就系经典。系好多女仔心理面,甲虫车嘅地位拍得住hello kitty无嘴猫或者Barbie公仔,甚至连男仔都俘虏埋。最新款甲虫车属于第三代,不过感觉上大众出呢部车,其实系为左向第一代致敬。系古典潮车呢个市场里面,甲虫车系玩得最复古嘅,而同场竞技嘅例如Mini、500仔唔多唔少都比大时代污染左。不过一味老土系唔得嘅,为左系新世纪玩尽复古元素,新车甚至搬左好多第一代嘅经典设计上去,斋睇距层皮虽然古典,但系内里就散发最新科技。
虫新开始-------甲虫1.2 TSI - Ryan  - Ryan粤语车评
大众集团玩家族面谱玩上瘾,好彩甲虫车避过一劫,不过话晒都系同一屋檐下,所以新车嘅头泵把隐隐约约有小小高尔夫头泵把嘅影子,所以你会觉得新甲虫好似嘟起个嘴仔咁,其实距真系嘟嘴架!如果唔挂车牌上去,仲觉啊!甲虫车经典车头当然要有巨型嘅激凸沙板啦,呢个设计绝对系古典车杀手锏,力量感好强。除左复古沙板,复古车头冚都好有睇头架,系宜家间间车厂都玩起角款式嘅年代,要稳部圆碌碌车仔睇下真系要好讲缘分。
虫新开始-------甲虫1.2 TSI - Ryan  - Ryan粤语车评
呢度系三个时期嘅甲虫,最上面嘅系最新款第三代潮人杀手,跟住中间嘅系第二代少女杀手,而最下面嘅系第一代师奶杀手。从车身侧面睇呢,第三代同第一代最似,车顶弧度细D,而第二代车顶最圆,所以第二代出名系女性专用车,如果有条麻甩佬开住距,一般都会觉得距可能开左距条女部车出来哨街,或者直接怀疑距嘅性取向。第一代甲虫车系1938年出世,所以唔好睇少呢个70年几前嘅设计啊,事关系地球上已经有超过2250万人为呢个造型埋单,而且呢个数字只系第一代同第二代,宜家第三代一出,又破纪录喇。
虫新开始-------甲虫1.2 TSI - Ryan  - Ryan粤语车评
新款甲虫车嘅车尾其实同第二代差唔多,不过尾灯就重新设计,虽然唔再系一个圆形,但系似足一只饭壳反而觉得车尾更加流线型,经典车最难搞嘅就系换代之后嘅外形,因为前一代嘅人面实在太广,贸贸然搞搞新意思可能即时赶客,所以呢D车转款一般都系执头执尾改小小,点到即止。
虫新开始-------甲虫1.2 TSI - Ryan  - Ryan粤语车评
硬顶版甲虫终于用无框车门喇!事关一直以来甲虫虽然系双门车,但系开门依然仲用类似家庭车嘅有框设计,唔系话距肉酸,只不过总系觉得差紧D野咁咯。双门跑车尤其系呢D,用无框车门系最有feel嘅,打开车门,无框会令人觉得你够晒不羁同放荡,如果只门有框,D人会觉得你好似岩岩买完送咁。新甲虫嘅车门几跑车化,一般我地见到嘅车门会有一个凹槽放野,而呢部车车门就得个网兜。中控台系重新设计,面板同车身同色,而且太盘用左平底设计,方便司机上落。细心嘅朋友会见到中控台上高有三只表,可以显示机油温度,计时同埋TURBO压力。而副驾驶位前面嘅双层储物格够晒复古,同第一代一样,个盖直接系你面前弹开。
虫新开始-------甲虫1.2 TSI - Ryan  - Ryan粤语车评
开门之后,同上代最明显区别就系个花樽唔见左,有开过上一代嘅朋友应该记得,中控台有个花樽。新款甲虫无左呢个娘炳设计之后,顺势跟住高尔夫一齐玩跑车feel,首先就有两张型仔桶凳,虽然系手动调教角度,不过好容易稳到岩你嘅坐姿。点解要咁整呢?事关爷爷甲虫果阵系由保时捷设计,当年话就话出部平民百姓车出来益街坊,但系当时嘅甲虫根本就系一部高性能车仔,而且事隔咁多年,好多车迷对甲虫嘅印象都停留系第二代,所以第三代变成咁会有D唔适应。拿,呢D就系一味追新车嘅坏处喇,静系识得自己年代嘅车,对以前嘅车一无所知。
虫新开始-------甲虫1.2 TSI - Ryan  - Ryan粤语车评
新款甲虫嘅后排表面上系两张简单座椅,但系距功能都好齐架,比如三点式安全带,ISOFIX儿童座椅固定接口距都有。呢部车嘅内笼气氛比我感觉就系干净,然之后先系整齐,其实宜家新车设计都避免太花巧,最紧要简单实用。呢部1.2涡轮增压版有齐真皮太环、真皮座椅、电窗电镜、定速巡航功能、太环前后上下调节功能、头灯角度调整功能、抗紫外线隔热玻璃、后排五五分拆功能、支持AUX同USB嘅单碟CD机同埋6只喇叭。呢D全部都系实用装备、而且系中控台无乜特别突出嘅按键,但系都好易稳得到。
虫新开始-------甲虫1.2 TSI - Ryan  - Ryan粤语车评
一按个车尾厂徽就可以打开呢个唔大唔细嘅尾箱,尾箱上面有个隔板,你可以用可以唔用,但系唔好系隔板上面放野,距好薄嘅。今代甲虫因为改左车顶造型,所以车顶线条拉到落车尾嘅角度大左,尾箱空间好过上一代,不过因为尾门造型都系偏斜,要放嘅物件最好唔好超过挡板嘅范围,如果唔系就关唔到度门。所有两厢车、包括呢D甲虫车,尾门开口范围都几大,所以组装功力要够深厚,如果唔系行车过程中D杂声随时令你崩溃,新甲虫做得几好。
虫新开始-------甲虫1.2 TSI - Ryan  - Ryan粤语车评
打开头冚,上面有块造型奇特嘅隔音棉,而引擎舱里面训系度嘅就系一副1.2升直四涡轮增压引擎,属于大众最新嘅TSI引擎,主要系食住降低排量之后用低压TURBO榨取动力呢个潮流,呢副引擎有105匹,相当于大众高尔夫6代嘅1.6升自然吸气,而1.2T呢副引擎最大扭力有成175牛米,最紧要系呢D扭力系1500转就开始黎料,一路爆到上4000转都仲有架,而且今次用左7前速双离合波箱,开起身都算几轻快。呢部甲虫大概重1吨3,如果用以前105匹嘅大众引擎去理解,大致上同1.6嘅旧款花冠差唔多,但系开起身完全唔系105匹嘅感觉,反而有小小似120匹嘅错觉。
虽然呢部车起步果下系有D呆,但系TURBO着左之后D力就冲出来,因为1.2始终系细排量,距嘅涡轮迟滞明显比1.4T嘅更加犀利,不过175牛米扭力又唔系太夸张,所以开起身唔会觉得好古怪,再加上呢个7档波箱好识得将转速保持系出力范围,基本上除左起步之外,全程都唔会觉得唔够力,再加上呢副引擎够晒轻,对于呢D前驱车来讲有好无坏,车头更加听话,而且推头唔会太犀利,虽然零到一百要过10秒有多,不过一部车嘅速度感同驾驶投入感,绝对唔系呢D数字可以概括咯。 
虫新开始-------甲虫1.2 TSI - Ryan  - Ryan粤语车评
唔止一次听过D朋友话保时捷设计师白收人工,出来出去都系咁嘅款,但系,如果你中意玩圈相游戏,即系稳出两张图嘅分别果D,你用呢种态度去睇每一代嘅保时捷,其实你会发觉改变真系好大,只不过整体唔明显,但系就越来越精雕细琢。甲虫都系一样,不过距明显D,而且只有三代,所以会有D跨度,唔似得911波子咁,一代一代一D一D咁去修改,所以观感会有D过渡。总体来讲,呢部1.2T甲虫仔继续行翻偶像路线咯,虽然型但系唔算好型,虽然Q但系唔算最Q,但系你都仲可以一眼睇得出距系甲虫。至于1.2T引擎,襟唔襟捱宜家仲系未知之数,不过可以肯定嘅系要食97号汽油。至于呢部车嘅行车表现,如果你系代步用,距有惊喜比到你,呢D系大众调校引擎嘅功力,宜家连骰仔甘大粒嘅引擎都可以玩到咁,唔到你唔服,传闻第日会有2.0T嘅版本入来,不过我就觉得距会同尚酷、高尔夫GTI重叠,就算入来都唔会系小型跑车界嘅主力,或者咁讲,国内99%正常人买甲虫,都唔系第一时间睇距嘅引擎。
 
 
  
  评论这张
 
阅读(547)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017