注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

种族主义------常见车型简介  

2012-06-28 10:03:22|  分类: 基本理论 |  标签: |举报 |字号 订阅

  下载LOFTER 我的照片书  |
种族主义------民用车型简介 - Ryan  - Ryans粤语车评部落
“啊边个边个又买左部新车啊!”“哦,咩车啊?”“宝马咯”“边款宝马啊?”“Er。。。。。。总之系宝马咯”,相信好多人都遇到过呢个情景。坦白讲,好多人仲系停留系牌子年代,即系见到一部车,先认牌子,对型号对车型唔系好在意,依家好好多啦,识得讲三厢两厢,齐尾揭背,硬顶软顶,但系对于车型仲系好模糊。大部分人认车都系先睇外形,但系由于设计观念越来越超前,外形已经唔可以百分百话你知距系乜东东,要了解一部车,尤其系D外形古怪牌子唔热门嘅车,如果有族谱就要稳族谱,无族谱就要查家宅。人与人之间嘅接触好多时都系由“车”呢个话题开始,识多D野就等于识多D朋友。今次同大家一齐研究下,我地平时系街见到嘅车有D乜嘢类型,距地嘅作用系乜,同埋点解会有呢D车型出现。
种族主义------民用车型简介 - Ryan  - Ryans粤语车评部落
先讲一讲最常见嘅房车,房车英文叫sedan,房车系中国大陆一般都叫轿车。房车历史悠久,从最初用来代步,到越来越追求安全、豪华甚至运动性能,房车已经唔系代步车甘简单,依家已经变成左身份嘅象征。传统房车系三厢设计,第一厢系引擎舱,第二厢系司机乘客嘅活动空间,第三厢就系车尾行李舱。一般房车为左方便乘客上落同尽量载多D人,都会有四只车门,五个座位,前面坐两个,后面坐三个,比如奔驰C级房车。但系有D豪华房车得四个座位,因为要令后排更加阔落同多D野玩,后排得两个位,奢侈豪华先系呢类车嘅最大卖点,比如新款积架XJ嘅顶级两座位版。房车外形经过甘多年发展,已经唔系好似最初甘平面方角设计,到左依家已经融入好多跑车线条,所以房车有左四门coupe甘嘅变种,比如奔驰嘅CLS,而且四门coupe又叫跑房车,即系似跑车嘅房车。
种族主义------民用车型简介 - Ryan  - Ryans粤语车评部落
Coupe其实就系双门车,又叫房跑车,即系一部有房车性格嘅双门车。Coupe一般用同厂房车修改而成,所以就算得两只门,一般都会保留翻后排。Coupe唔系主打高性能嘅跑车,而系保留翻一定舒适性同实用性。外形杀食系Coupe嘅出发点,同样系一部车,双门嘅设计一般都会靓过四只门。Coupe仲有一个特点,就系引擎往往系前面,不过驱动形式就可以好多种,比如CLK嘅前置后驱或者本田雅阁Coupe嘅前置前驱,虽然会有翻甘上下性能,但系就唔系纯种跑车格局。Coupe嘅卖点主要系有型,而且可以保留翻房车大部分功能,而且Coupe一般都有前排副驾驶位向前倾斜或者移动功能,方便乘客捐入后排。车厂造车除左想搞搞形象之外,往往都系睇钱份上,全世界最中意Coupe嘅地方就系北美,好多车型都会推出专攻北美嘅Coupe版,投其所好一向都系揾钱捷径之一。
种族主义------民用车型简介 - Ryan  - Ryans粤语车评部落
系之前嘅车评文章里面我都讲过,欧洲人同美国人都系好中意开住部车穿洲过省,所以旅行车会好好卖,尤其系Estate。Estate系SUV未出世之前已经有,一样系主打旅行实用。呢种车一般都系用四门房车做基础,从车头到C柱位都无乜大变化,但系车顶一般会有行李架,而且C柱之后重新设计,加上一个好似揭背车甘嘅尾门,一部三厢嘅房车就变成两厢旅行车,空间仲大过房车版,揭背设计可以运更多奇形怪状嘅行李。因为底盘同房车版一样,所以操控性能同房车接近,尤其系D多山路嘅地区,Estate一直都好高人气,唔单只超过房车,甚至连SUV都无距甘受欢迎。用房车底盘而且高度同房车差唔多嘅旅行车除左Estate仲有好多叫法,比如Wagon,Touring,Avant,Combi同Sportwagon等等,比较经典嘅德国旅行车就系E350 Estate,330i Touring,A4 Avant,绝对系居家旅行、草走难嘅必备架撑。
种族主义------民用车型简介 - Ryan  - Ryans粤语车评部落
房车系就系几舒服,但系开出街总有矮人一等嘅感觉,于是好多准备买房车代步嘅人都会去啉啉SUV。SUV其实就系多动能运动型车,系呢几年大热,无论牌子尺码价钱总有一款岩你,可以选择嘅范围简直同买衫差唔多。有人话SUV系越野车,但系大部分SUV嘅越野功能都好弱,所以我觉得SUV其实系越野车嘅变种。因为如果你开过以前嘅纯种越野车,比如早期嘅吉普牧马人同奔驰G级,你就会深深感受到越野车开上公路系折磨,因为距地太粗犷而且好原始,于是车厂就开始整一D同越野车差唔多身形,但系内笼同底盘都追求房车表现嘅车,呢个就系SUV出世嘅原因。SUV偏重旅行表现,一般都唔会好细部,底盘跟翻同厂同尺码房车,唔一定系四驱车,两驱都会有,所以SUV其实比较适合城市代步或者长途旅行,系一种好休闲好自在嘅车,比如凌志RX系列。SUV同越野车最大分别在于底盘,传统越野车为左克服恶劣环境都会用大梁底盘,甚至用硬轴悬挂同钢板弹簧,而SUV用房车底盘,所以悬挂避震都可以跟翻房车,但系为左无甘易拖底,底盘会比房车高。底盘高就视野好,而且SUV一般都用两厢设计,除左引擎舱之外,驾驶室同尾箱连通有好大空间任你用,无论司机同乘客都会觉得好开扬,大车格局可以令人觉得好安定,所以呢个都系越来越多女性用SUV代步嘅原因,为嘅就系一份安全感。
种族主义------民用车型简介 - Ryan  - Ryans粤语车评部落
揭背车对年轻人嘅吸引力有几大,行出街就会知。顾名思义,揭背车就系车尾有一道向上揭嘅车门,所以往往都系两厢设计,而且因为尾门向上打开,只要货物塞得落就可以装,再加上一般后排可以拍低,电视机洗衣机饮水机都可以放入去。对于车门来讲,要有齐车窗而且开门嘅时候开埋个窗,甘先为止系一只车门,所以除左侧面车门之外,揭背车嘅尾门都系属于车门,而且揭背车除左五门揭背之外,仲有三门揭背版,高尔夫系列就系一个例子。绝大部分揭背车仔都细过同厂房车,所以都会将距定位为入门车,好多岩岩毕业嘅学生或者社会新鲜人就会买距来玩,再加上揭背车操控感觉一般都好敏捷,而且绝大部分都系前驱设计易控制,连女性都会中意买。除左定位系入门车之外,轻巧都系揭背车嘅特点,只要用一副大力引擎,追加适当包围组件同埋底盘调校,就可以转身成为高性能揭背车,系呢个级别,依然都系高尔夫GTi最有代表性。
种族主义------民用车型简介 - Ryan  - Ryans粤语车评部落
如果你平时生活同工作嘅地方唔系尘土飞扬又无乜人高空掷物,开住部开篷车周围走的确好顶瘾。开篷车嘅品种可以用座位数同车身大细来区分。如果有前后排座椅,一般都可以叫距做Convertible或者Cabriolet,比如CLK开篷版。如果得两个座位,一般叫距做Roadster或者Spyder,比如宝马Z4同法拉利430 Spyder。同房车全天候封顶唔同,开篷车可以比到你一种完全唔压抑嘅感觉。大部分嘅Convertible车款都系来自同厂同系列嘅Coupe车型,比如CLK开蓬版就系来自CLK硬顶版,所以Convertible关左车顶之后内笼空间同Coupe版差唔多,而且起码有四个座位,实用性唔会太差,反而系尾箱空间唔大,因为要车身留翻D位摆个车顶,所以行李箱空间会压缩。早期嘅Convertible车型好多都系软顶设计,依家就反而偏向用硬顶,硬顶开篷嘅Convertible一般将车顶分成几份,用电动马达来驱动开蓬关蓬,好多人都好享受呢个变形嘅过程,而且硬顶开篷车无论隔音放水隔热都比软顶好,关蓬之后同一部Coupe无乜分别,不过硬顶开蓬车有等于无嘅尾箱空间同埋超高嘅维修保养,就要型仔车主承受。
种族主义------民用车型简介 - Ryan  - Ryans粤语车评部落
头先讲过开篷车嘅另一个品种叫做Roadster,主要系因为呢类型嘅车系标准双门双座位设计,系最唔实用嘅开篷车。虽然Roadster唔可以好似一般房车甘车住几个人嘻嘻哈哈,但系就可以自己一个人享受小型跑车比你嘅感觉,甘当然啦,你隔离坐住个咩人,都会好影响你嘅心情。Roadster除左型仔指数爆灯之外,最紧要系想带比你自由自在嘅感觉,所以一部标准嘅Roadster就算乜嘢舒适性装备都无,唔紧要,距可以用驾驶乐趣搭救。事关绝大部分嘅Roadster都系用前置引擎后轮驱动布局(宝马Z4),或者中置引擎后驱布局(丰田MRS),再加上车长控制系4米左右,甘细部车搭配一副岩岩好嘅引擎再加埋刚性十足嘅车架,你都米话唔过瘾。不过都有例外,比如奥迪TT呢种就会用前驱或者四驱设计,Roadster由于追求轻巧,往往都会用软顶开篷设计,最经典嘅就系早期万事得MX-5同埋旧款嘅宝马Z4,但系近年来有硬顶开篷车加入,比如奔驰SLK同埋新款宝马Z4。Roadster嘅宗旨就系轻巧同埋弯道刁钻,系真正嘅驾驶机器。
种族主义------民用车型简介 - Ryan  - Ryans粤语车评部落
想冲出石屎森林去到一个无雷公甘远嘅山头透下气种下树,就只能够稳部越野车喇。越野车严格来讲属于军车嘅民用版,最有代表性嘅就系吉普牧马人,甘多年来都系甘原汁原味。一部标准嘅越野车要全时四驱而且要有大嘅接近角同离去角,如果唔系山脚都未上到就要翻转头。虽然系越野车嘅世界里面,吉普牧马人同路虎卫士都有好顶尖越野性能,但系灵活性方面始终都系奔驰G仔优胜。依家越来越多人买SUV,目的都系想要越野车甘嘅身形同埋视野,甚至将SUV同越野车两样野捞乱,总体来讲一般嘅SUV唔似越野车甘可以克服最艰巨路面,而越野车又唔够SUV舒服。科技不断进步,依家好多贵价SUV都会装专业越野装备,比如落斜坡辅助系统、牵引力控制系统、上斜坡起步防溜后甚至全地形适应系统等等,令到一部豪华为主嘅SUV可以冲上山顶而且落得翻山脚。依家玩纯种越野车嘅人一般系越野车会成员或者纯粹私人收藏,用来代步嘅少之又少,越野车都系应该系树林里面出现。
种族主义------民用车型简介 - Ryan  - Ryans粤语车评部落
 对于多功能车来讲,一定系大空间行先,虽然MPV同旅行车一样都系两厢五门揭背设计,但系为左要更大内笼空间一般都会用类似SUV嘅高车顶设计,根据车身尺码来区分就有Mini-MPV、Compact MPV同Full-Size MPV三种。先讲Mini-MPV,最有代表性嘅就系第二代本田飞度,比一般车仔有更大空间,至于Compact MPV,就有本田奥德赛做代表,因为有三排座椅而且第三排可以折埋,机动性更加强。 而全尺寸MPV来讲,最有代表性一定系7人车王丰田Alphard,车身已经大到接近VAN仔,所以全尺寸MPV又叫Mini Van,呢类型嘅车一般可以坐5-8个成年人。无论咩野MPV都好,底盘都系来自同厂车系,所以操控特性都属于平稳一类,只不过车顶将重心拉高,急弯表现会比较弱。MPV成熟稳重,内笼接近SUV,所以好多家庭会买来旅游或者平时接送细路翻学放学,全尺寸MPV就会用来做明星保姆车或者公司企业接送VIP,大方得体空间阔落系呢类车最大卖点。 
种族主义------民用车型简介 - Ryan  - Ryans粤语车评部落
商旅车英文名叫做Van,Van系Caravan嘅缩写,Caravan原本意思系穿梭丝路嘅骆驼商队,用系车上面就变成左可以运送货物同商务接送嘅商旅车。呢类车外形会比较似MPV,但系车身更加巨型,而且外形设计都系简单务实为主,望落去好严肃,一睇就知道系正经人家。Van因应各行各业唔同需要,同一款车都会有好多车身形式同引擎规格可以拣,如果系特殊用途比如救护车探测车甚至专业雪糕车,车厂都可以帮你定做。另外,如果要用来载人往返AB点,坐得落12--15个成年人嘅巨型车身都可以做得到,甚至后面仲有空间放行李。宜家市面上可以买到嘅Van都系欧美牌子居多,比如福特全顺、雪佛兰Express、奔驰凌特、VIANO、Vito等等。Van其实好早就已经系国内出现,最大名鼎鼎嘅平价Van王就系丰田海狮,呢一类型车要卖得好除左大之外,都系靠口碑。
种族主义------民用车型简介 - Ryan  - Ryans粤语车评部落

美国佬除左中意倒油一样嘅肌肉车之外,Pick-up都系距地嘅心头好。Pick-up最早系19世纪初发明,系国内叫做“皮卡”,同高头大马嘅货车唔同,距主要用来比车主搬屋、农民就用来拉农具,车头似房车甚至似跑车,底盘比一般房车高,车尾系一个货斗。根据唔同要求,Pick-up都可以有唔同车身尺码,一般可以用驾驶室设计来区分,比如双门单排座、双门2+2双排座同埋最常见嘅四门双排座。全世界最受欢迎嘅Pick-up来自福特车厂,而且基本上间间美国车厂都会有自己嘅 Pick-up代表作。除左美国牌子之外,都有D日本野加入Pick-up行列,国内最常见嘅就有Izusu、Nissan同Toyota几个牌子,甘当然喇,国货都有,比如长城皮卡、中兴皮卡等等。虽然用车环境唔同,但系Pick-up始终系最实用嘅家庭车之一,有D工厂会买来跑业务,而有D单位会买来做工程车,贪距有房车嘅灵活性而且载货多,而且对于好多岩岩出来创业嘅年青人来讲,Pick-up都系热门稳食车。种族主义------民用车型简介 - Ryan  - Ryans粤语车评部落

TVB《心战》热播,好多人问陈豪开果部系乜嘢车,其实距系韩国双龙车厂嘅Actyon Sports SUT。 SUT?咩黎架?SUT其实就系Sport utility truck嘅简称,直译就系运动多功能卡车,最初嘅SUT来自SUV,只不过车尾由封闭变成开放式货斗,而货斗上面可以加个盖,唔加都得。内笼方面,SUT一般可以坐4---6个人,而且系四门双排座设计,车头设计就跟翻同款SUV。甘嘅设计就系令到部车有SUV嘅外形同性格,而且有皮卡嘅载货能力,严格黎讲就系SUV同Pick-up嘅CROSSOVER。宜家最经典嘅美式SUT有几款,比如卡迪拉克 Escalade EXT、雪佛兰 Avalance同埋悍马 H2 SUT,而日本仔方面就有部本田 Ridgeline担大旗,因为要抢滩登陆北美市场,所以无论外形同内笼都系豪华为主。系北美,SUT同Pick-up大把世界,而系国内,因为油价高企同埋塞车越来越严重而且停车位越来越细个,所以SUT市场唔大,环境问题真系好难解决。

种族主义------民用车型简介 - Ryan  - Ryans粤语车评部落

其实从上个世纪末开始,休闲旅行嘅潮流一直都未停过。过往嘅越野车衍生出SUV之后,消费者又试转口味,开始中意多功能车,而且希望买一部车翻来可以多种用途。车厂开始研究一D好难用传统车型定义嘅新型汽车,所以一般呢D车都叫做CROSSOVER车。讲到CROSSOVER车款,就唔可以唔讲下将CROSSOVER玩到透嘅宝马公司。宝马出左一部X6M,真真正正将房车、跑车、跑房车、SUV大兜乱。作为一部跨界车,一般要有齐其他车嘅性格,好似X6M甘,有Coupe流线车顶造型,有SUV高底盘同四驱,有跑车加速表现,有房车嘅隔音水准同舒适性,一部车就搞掂晒上落班代步、周末癫丧山路激飞、一家五口出外郊游。未来仲会有好多CROSSOVER车同大家见面,不过呢D车就好似三合一洗头水甘,可以多用途,但系无一样专业。种族主义------民用车型简介 - Ryan  - Ryans粤语车评部落

睇到呢度,应该嘥左你地生命中唔少时间,最后讲讲大部分地球人嘅梦想-----Performance car。识英文嘅人直译就知道,讲嘅系性能车。其实性能车呢个词语好笼统,总体来讲副引擎够劲、操控够辣嘅车都可以叫做性能车。呢一类型嘅车一般都系纯种跑车设定,比如两座位、中置引擎、矮车身呢D元素,一样都唔可以少。因为追求极端行驶性能,Performance car一般都无乜实用性,为左车身配重更加好,引擎摆系两个座位后面而且后驱出力,比如法拉利458 ITALIA。不过都有例外,就系类似保时捷911系列嘅引擎后置设计。由于科技越来越劲、引擎马力又越来越颠,有钱佬嘅技术又越来越屎,Performance car开始用四驱同埋半自动波箱来满足距地,比如林宝坚尼新牛王LP700-4 aventador。有D车厂会坚持车身轻量化,不断研究车身材料同空气力学,目的就系继续用后驱,系呢方面,依然系法拉利入门马王458 ITALIA最有代表性。系性能车呢个级别,价钱同性能都系顶级,而且性能要摆系第一位。好喇,今期就讲到呢度,相信你对车嘅理解应该又加深左小小,汽车系一个好好嘅兴趣同爱好,先唔讲有车定无车,起码首先要知道你面前果部系乜嘢车。

 
 
 
  评论这张
 
阅读(640)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017