注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

明星相-----1998款凌志IS200(GXE10)  

2012-05-17 15:41:48|  分类: 经典名车 |  标签: |举报 |字号 订阅

  下载LOFTER 我的照片书  |
明星相-----1998款凌志IS200(GXE10) - Ryan  - Ryans粤语车评部落
对于以前嘅凌志来讲,基本上都系追求宁静同舒适,好少会有D好好飞嘅凌志,哪怕有一副大排量引擎嘅GS300,或者用无框车门嘅ES300,都系一D表面上跑车,但系依然系房车。1998年嘅时候凌志出左一部细码嘅车仔,代号GXE10,亦都系新开嘅一个系列,IS系列。而当时呢款车都有丰田版,就系大名鼎鼎嘅ALTEZZA,以1998年嘅车来讲,呢个款头堪称经典!IS系列出现嘅目的主要系抢宝马3系D客,同埋睇下可唔可以顺手抢埋开惯奔驰C级果D经理仔。打头阵嘅就系今次嘅主角---IS200,虽然唔算好猛,但系胜在够平衡,呢部车我第一次试嘅时候系04年,果阵系新车,第二代嘅IS都未出,可以话系一部货尾,相隔6年之后,呢一代IS已经可以话遍布各大二手车场,但系价钱就一D都唔吸引,好多都仲叫紧十几万,如果想买距最好就等下先咯,呢部车系几值得玩嘅。
明星相-----1998款凌志IS200(GXE10) - Ryan  - Ryans粤语车评部落
细心嘅朋友已经发现到问题喇,原装嘅IS200唔系用呢条包围嘅,呢部车系换左日本版丰田ALTEZZA嘅包围,唔好睇少呢部ALTEZZA啊,事关距用一副220匹引擎仲有6速手波,呢D装备用系细车度已经越级,所以好多IS200改外形都会参考下距,精神领袖嘅威力真系唔可以睇少。IS200其实唔大部,大约同一部卡罗拉差唔多大,但系就比距矮,而且车头用晒最容易接受嘅设计,比如好普遍嘅鹰眼头灯,梯形中网等等,但系系细节上将呢D部分削尖距,配合埋头冚上面两条好高嘅骨位,个样即刻生猛晒。
明星相-----1998款凌志IS200(GXE10) - Ryan  - Ryans粤语车评部落
行过小小就会睇到部车连胎铃都换埋,不过我个人就唔系几中意密爪,我系五辐式合金铃嘅拥趸。因为系度身定做嘅包围,所以所有嘅接位都系对到正,一D山寨嘅感觉都无。如果买左呢部车要改外形呢,呢套包围可以话系岩晒!头先到讲过,其实IS200每一个部分都好普通,但系合埋一齐就唔同晒,因为系部车嘅比例方面,丰田佬有落功夫,既然要对著3系来打,干脆连比例都抄到足,我有一部E36 325,对比翻IS200嘅车头,两只门同车尾,距离都系差小小,甚至连两只侧镜都好似样,只不过我果块有件蓝色膜,而IS200就用一般反光银色。
明星相-----1998款凌志IS200(GXE10) - Ryan  - Ryans粤语车评部落
去到车尾就会觉得开始有D奔驰C级嘅feel,因为大家都用三角形尾灯,但系里面距就用左个大红点,周围就透明,提升左小小科技感,尾厢盖仲有两个红点,其实尾厢盖同奔驰C级果个都系好似架,车尾果条包围系一条小包围,系甘咦衬翻换左嘅一条巨型尾喉。呢条喉我觉得应该系HKS嘅出品,因为D声初期好沉,沉到周围D野都好似震甘,以前系一个视频网站睇过HKS嘅测试视频,一样系IS200,D声真系好似。
明星相-----1998款凌志IS200(GXE10) - Ryan  - Ryans粤语车评部落
呢只尾翼其实唔系原厂嘅,系一条本田雅阁嘅尾翼,应该系CD5时期嘅款式。最近系佛山有好多房车都加左大尾翼,尤其系思域同三菱嘅旧款菱帅,其实用细尾翼效果都好好架,用大尾翼唔系唔好,事关距地D车嘅高性能版本都系大尾翼,但系大尾翼比人感觉会比较浮夸同埋造作,尤其系条街度,装条细嘅尾翼就会觉得比较有品味D,毕竟街车同赛车唔同,尾翼要系高速先可以发挥作用,系街都系唔好甘招摇喇。
明星相-----1998款凌志IS200(GXE10) - Ryan  - Ryans粤语车评部落
打开只轻飘飘嘅车门,就会见到好日式嘅内笼。我发觉好多人买车中意拣真皮坐椅,如果系坚嘢,甘梗系真皮座椅舒服啦,但系如果比D环保皮比你,就不如参考下IS200嘅座椅,距系半皮座椅,坐垫同靠背其实系一层好似绒布嘅材料,都几防跣架,开部呢D甘型仔嘅车,系里面左跣右跣就唔系几好啦。呢部IS200太盘用左双色设计,唔知系米原装,但系出来个效果几好,我觉得太盘其实唔使甘多银色,因为呢D银色饰件一多,就会觉得老土。
明星相-----1998款凌志IS200(GXE10) - Ryan  - Ryans粤语车评部落
关埋门坐定定之后,会发觉坐姿唔算特别矮,视野都算开阔,但系A柱位置依然有盲点,再加上两边侧镜唔够大,有车系隔离超上来可能会睇唔到。一睇个中控台,就知道系日本野,因为D设计都系比较易稳,太盘几就手,大细都岩,D皮都几啜手。隔音来讲都几好,唔系好觉已经着左车,手刹离司机比较远D。三件踏板都系靓嘢,唔知系米原装,踩落去好似有D远,防滑几好。波滚头换左一个圆形金属,之前应该系皮套来嘅,波箱控制就用翻90年代好兴嘅蛇仔档,下面系一个4前速自动波,部车储物空间唔系好多,岩岩够用。
明星相-----1998款凌志IS200(GXE10) - Ryan  - Ryans粤语车评部落
惊喜系呢度,本来呢个仪表板都系用好传统嘅左边转速,中间时速表嘅设计,但系丰田佬就系时速表里面放左三个表仔,有水温,电压,同埋瞬间油耗,呢D表一齐跳嘅时候D跑车感觉即时翻翻来,右手边有个油表,下面个SECURITY应该系防盗,而右下角嘅L23DNRP,就系档位显示。IS200嘅仪表板算系有特色,而且用左红色光,晚上睇应该会更加醒神,一部主打操控性能嘅房车来讲,呢D设计系好有必要嘅。 
明星相-----1998款凌志IS200(GXE10) - Ryan  - Ryans粤语车评部落
无论系同时期嘅宝马3系,定系奔驰C级,后排嘅空间都唔会话好大,因为本来车身都唔系大,而且系后驱车,中间又要行传动轴,所以基本上后座都系坐两个人好D。IS200嘅后排空间我觉得同以前嘅大众宝来差唔多,但系椅背就比较斜,感觉上会坐得舒服D,但系针无两头利,如果长时间甘嘅姿势,个人都会好易攰。买呢D小型车,如果好介意空间呢,最好都系拣翻前驱车,或者索性买部大D嘅,事关呢一类型嘅后驱车,后排都唔会舒服得去边。
明星相-----1998款凌志IS200(GXE10) - Ryan  - Ryans粤语车评部落
揭开头冚就会见到一副代号1G-FE,155匹嘅2.0升嘅引擎,一般2.0升引擎都系用四缸,但系IS200系用6缸,甘做有咩好处呢?大家有无留意过,部车系怠速嘅时候会震,但系转速高反而唔震呢?因为汽缸里面有活塞做往返运动,同一个排气量前提下,六缸引擎活塞嘅路程肯定会比四缸引擎活塞嘅路程短,活塞运动加快左,再加上有丰田VVT-i技术帮手,令到高低转速切换嘅时候更加顺,所以部车先会又静又快。IS200大概有一吨四,155匹嘅引擎话快唔快,话慢唔慢,但系部车行起身嘅感觉就好高级,无论车身跳动定系转弯嘅时候车尾嘅反应,都好似同时期嘅宝马318i,只不过因为力水唔够,而且有四速自动波拖累,呢部IS系列里面嘅最低配置都系岩用来上落班、游车河或者间中冲下高速,再加上凌志质量有翻甘上下,系呢个角度睇,的确系一部日日开都无投诉嘅好车,有乜理由唔红呢?
明星相-----1998款凌志IS200(GXE10) - Ryan  - Ryans粤语车评部落
正所谓人靠衣装佛靠金装,任你几省镜如果无翻套似样嘅衫,都只会sai左你个靓样。我见到好多买左IS200嘅人都会搞下外形,除左头先讲过嘅斋装包围素颜look之外,其实可以斋玩变色都得架,比如呢部甘。IS200外形属于比较尖锐,如果贴拉花贴到乱龙,又好似sai左个甘干净嘅造型,如果搞哑光色,又好似怪得滞,我觉得可以纯粹系颜色落手,依然系反晒光嘅金属漆,但系就要变色,系唔同嘅角度欣赏唔同颜色嘅IS200,系一件好开心嘅事,但系部车一定要干净。  
明星相-----1998款凌志IS200(GXE10) - Ryan  - Ryans粤语车评部落
如果你有畏高,就不妨座低部车,比如玩下好有攻击性嘅hellaflush风格。乜嘢系hellaflush呢,简单来讲就系胎铃外面同车身齐边嘅感觉,令到部车同四个辘系一个整体,而且要尽可能座低部车,虽然无话一定要几低,但系就一定唔可以系车辘同叶子板中间有空位。玩hellaflush呢,好多人会装空气避震,甘就可以系路度照样高速行驶,而且去到人多嘅地方又可以趴系度,好多都可以低到连车辘都收入去轮拱里面,总之要有“低低地”嘅效果。
明星相-----1998款凌志IS200(GXE10) - Ryan  - Ryans粤语车评部落
如果唔想“低低地”,而且想发挥IS200嘅后驱天份,不妨可以考虑下将距改装成漂移车。日本著名车手谷口信辉曾经都系渣住呢部HKS改嘅IS出来杀敌,系漂移比赛里面发光发热。不过要将IS200改装成漂移车要注意一样野,就系车身强化,事关漂移对车身嘅要求好高,左掟右掟、高速拉手刹都会将车身扭曲,所以第一步应该先做好强化。至于动力,其实IS200本身关左TSC稳定系统都可以甩几下,主要系155匹细左D姐,如果换引擎,或者装增压器相信会有好大帮助,甘当然啦,玩得漂移,你唔会唔装LSD就落场甘失礼死人挂?
明星相-----1998款凌志IS200(GXE10) - Ryan  - Ryans粤语车评部落
如果唔中意玩十几分钟就要换胎嘅烧钱漂移,可以考虑下将IS200变成一部练习咬地跑法嘅战车。系日本,有一部叫做RS200嘅另类战车,用一副YAMAHA公司帮手调教嘅3G-GE四缸引擎,最大马力220匹,有6速手波兼后轴LSD,好多IS要落场都系参考距来改,系以往嘅2000CC级别比赛里面,都会时不时见到有丰田车出马,但系依家本田嘅K20A引擎可以话系标准装备,所以本田车占左绝绝绝大部分,甚至觉得呢个组别已经变成左本田杯!有心有力嘅IS车主不妨试下将距改成RS200,未必丰田VVT-i会输比本田i-VTEC嘅。
明星相-----1998款凌志IS200(GXE10) - Ryan  - Ryans粤语车评部落
依家越来越多凌志系街度行,LS,GS,ES,LX,GX等等,好似唔使钱甘。凌志比人嘅感觉一般有两个,一个系有钱但系好低调,一个系日本车王注重舒适。其实IS都得架,比如上面呢幅图甘,同样系IS200车架,但系就装左自然吸气SUPRA上面嘅3.0升嘅2JZ-GE,RS200上面嘅2.0升3S-GE,仲有双涡轮增压嘅2JZ-GTE,最经典嘅系连旧款LS430上面果副4.3升 V8都有!可以话要几暴力有几暴力,要几宁静有几宁静,系换引擎嘅角度来讲,IS系最包容嘅一款车。2012年就来过左一半喇,可能你会觉得一部1998年出现嘅车老到甩晒牙,但系我反而觉得距比好多2012年出世嘅车都靓,你地话呢?
 
 
 
 
 
  评论这张
 
阅读(3461)| 评论(4)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017