注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

激烈猪扒----丰田 SUPRA JZA80  

2012-03-06 15:07:08|  分类: 经典名车 |  标签: |举报 |字号 订阅

  下载LOFTER 我的照片书  |
激烈猪扒----丰田 SUPRA JZA80 - Ryan  - Ryans 粤语车评博客
一讲到猪扒,可能你会啉起餐台上面淋左黑椒汁或者洋葱汁一块块果D或者街上面发姣发dun无人望果D。我甘讲唔系歧视猪扒,相反我觉得猪扒都有距自己嘅特点,比如味道,不如一D生得唔系甘靓嘅女仔会比一般嘅靓女发奋,即系我地平时讲嘅“实力派”。系车嘅世界里面都有猪扒,受限于当时嘅审美观或者科技,可能距个样唔够一D现代化嘅跑车醒目,又或者开起身唔系甘就手,但系只要整下容或者对机件改装,就会有唔同嘅感觉。SUPRA系丰田系列里面外形最奇特嘅跑车,但系性能上面就一D都唔输蚀,无论原装改装,斗直线定系斗甩尾,都难唔到距。SUPRA发音同我地广州话嘅“猪扒”差唔多,所以D人如果讲话猪扒跑得好快,其实唔系讲紧人。今次为大家介绍嘅SUPRA系1993年款,代号JZA80。
激烈猪扒----丰田 SUPRA JZA80 - Ryan  - Ryans 粤语车评博客
呢一代SUPRA第一次出现系系1993年5月,属于GT跑车。当时嘅日本跑车大部分都仲系用方形设计来表现硬朗跑车性格,但系SUPRA唔同,距反而用左偏向美国feel嘅圆碌碌设计,甘嘅设计优点在于可以减低风阻。SUPRA大概长4米5,阔大概1米8,但系车高就得1米2多小小,一眼望落去就觉得距似一旧番枧。对于GT跑车来讲,并唔需要好似纯种跑车甘抽得,反而比较中意突出可以用距舒舒服服去长途旅行呢个优点,所以SUPRA唔轻,有超过1吨5嘅体重,高速可以有接近欧洲房车车身噶稳定性。所以SUPRA同好多丰田车一样,系一种可以用来上落班嘅交通工具。
激烈猪扒----丰田 SUPRA JZA80 - Ryan  - Ryans 粤语车评博客
头先提到SUPRA车头美国味重,其实车尾仲严重。可能车厂想突出距嘅力量感,系车尾两边沙板抛得仲阔过车头,再加上原装四条合金铃缩晒入去嘅扫把脚设计,感觉沙板抛得仲犀利!熏黑左嘅尾灯比较凶狠,而且尾泵把有两边嘅扰流设计,整体感觉呢部车都系着重高速稳定性。另外,仲有一个GT跑车特有嘅元素,就系后尾箱盖打开会连埋后玻璃一齐开,而且后玻璃都有雨刮,SUPRA系好多车迷心目中嘅印象,都系在于呢个大pat pat造型。
激烈猪扒----丰田 SUPRA JZA80 - Ryan  - Ryans 粤语车评博客
内饰方面,无论边一个版本,都静系得全黑可以拣。入到车肯定第一时间会比呢个仪表板连中控台连扶手嘅设计吸引住,所有按键唔系面向司机位甘简单,直头系包住个司机!大致上除左音响同冷气之外,SUPRA有5个独立仪表,而且全部都系用指针形式显示,踩油刹制呢D表嘅指针都会跟住郁,跑车味好浓。另外,大家留意下距手刹同波棍嘅位置,离得好近,我啉呢个或者系好多人稳距练习甩尾嘅原因,升档降档即刻就可以系隔离拉手刹,呢一方面好就手。SUPRA前座位系两张桶型座椅,造型唔包身但系物料就比较防滑。坐落去唔会夹住条腰,但系当你开快车左掟右掟,你个身又唔会左跣右跣。呢款车嘅坐姿比好多跑车都要矮,因为部车本身已经好矮,而且座垫比较薄,身高唔够就比较难有好嘅视线,所以距内饰设计依然都系偏向美国佬口味,用距穿州过省应该无问题。
激烈猪扒----丰田 SUPRA JZA80 - Ryan  - Ryans 粤语车评博客
虽然SUPRA够晒大份,但系后排空间依然无乜优势。由于尾玻璃比较斜,所以距要将后排座垫偷薄,甘先可以叫做有翻小小头部空间。前排无论点样调,后排腿部空间都唔多,坐细路仔都得嘅,不过唔可以坐太长时间。张座垫甘薄,一路上dun都dun到距发育不良。
激烈猪扒----丰田 SUPRA JZA80 - Ryan  - Ryans 粤语车评博客
《速度与激情2》里面,做主角嘅靓仔卧底警察就稳左一部报废SUPRA,同班朋友一齐将距改到距成为一部"ten second car“,所谓十秒钟嘅车,唔系讲紧零到一百公里加速,而系讲紧要系10秒钟里面跑完四百米直路。而且大家留意一下,唔系留意隔离部法拉利355,而系留意SUPRA个车顶,有一批SUPRA采用左可以拆车顶嘅设计,用人手将距变成一部开篷车。
激烈猪扒----丰田 SUPRA JZA80 - Ryan  - Ryans 粤语车评博客
呢一代SUPRA有两款引擎,一款系代号2JZ-GE嘅3.0升直六自然吸气,最大马力225匹,配一个4前速自动波或者5前速手波波箱。而另外一款就系代号2JZ-GTE嘅引擎,同样系3.0升但系就用左两个涡轮增压器,最大马力上到280匹,搭配一个丰田同德国GETRAG公司一齐开发嘅6速手波波箱。重点讲一讲2JZ-GTE,其实呢副引擎系车迷圈子都好出名,无左距,SUPRA都做唔到牛魔王。2JZ-GTE采用直列六缸设计,铸铁中缸可以承受更加大嘅爆炸力。呢副引擎嘅特点系反应快,3.0排量推两个细涡轮机无乜延迟,基本上全个转速范围都系随传随到,而且出力唔算突然。由于有两个涡轮机,所以高中低转速之间衔接比较麻烦,如果调教唔好,就会有一个好明显嘅断层。2JZ-GTE虽然公布数字上系280匹,其实距已经有超过300匹嘅输出,由于体质好,原装基础上系供油点火冷却几个方面强化,都好容易上400匹甚至更高。2JZ-GTE如果经过扩缸、引擎内部强化、周边强化同埋换大码数涡轮机之后,目前大约可以推到1200匹,呢个并唔系极限,因为改装嘅世界系无止境嘅。甘当然,马力只系衡量一部车嘅其中一个标准。
激烈猪扒----丰田 SUPRA JZA80 - Ryan  - Ryans 粤语车评博客
好多人话跑车最紧要够马力,其实底盘先系跑车嘅灵魂。好多人话SUPRA系“直路狂弯路亡”,但系我唔系甘睇。SUPRA用左前双摇臂后多连杆悬挂设计,由于车身又肥又矮,感觉上操控感唔够直接,因为始终唔系纯种跑车,偏向GT跑车保留舒适感觉都唔出奇。如果系原装嘅SUPRA,应该甘样开,比如你入一个弯,你系直路就来完嘅时候就应该提前小小刹车,如果你一味挂住冲迟刹车,甘SUPRA系绝对配合唔到你跟住落来嘅扭太入弯动作,距会先有小小推头,呢D都系肥仔车特有嘅问题,就系惯性。好,到将部车拖到你觉得够嘅速度,跟住和住油门过弯,到出弯你再大脚油都无问题,因为呢个时候车嘅重心已经去左车头,要用SUPRA本身唔错嘅加速力度去补翻提前减速入弯嘅时间,甘呢个弯就算系甘,因为车本身有自己嘅性格,好多朋友唔会迁就呢嘅性格,可能平时开惯前驱或者四驱,惯左入弯已经逼部车嘅极限,唔系部部车都一样开法嘅。原装就讲到呢度,提一提改装,2JZ-GTE好有潜力,六七百匹马力嘅SUPRA都好多,或者改装嘅时候已经将目标定系直线加速,所以依家大部分改装SUPRA都系识向前冲,或者系因为甘,先会比人一种“直路狂弯路亡”嘅感觉,改装可以改变一部车嘅性格,但系原装就唔同,对于原装嘅SUPRA,其实都仲系好好开嘅。
激烈猪扒----丰田 SUPRA JZA80 - Ryan  - Ryans 粤语车评博客
作为一部大马力后驱车,SUPRA理所当然会参加直线加速比赛,点解直线加速比赛后驱车会有优势呢,系因为如果急加速,车头就会抬起,如果部车系前辘驱动,车头抬起果阵前辘抓地力就会唔够,起步慢左成绩就唔好,如果系后驱,个车头抬起嘅时候车尾反而会向下坠,反而增大左后辘嘅摩擦力。 
激烈猪扒----丰田 SUPRA JZA80 - Ryan  - Ryans 粤语车评博客
后驱车天生车尾就中意四围摆,依家系街上面D后驱车之所以易开,系因为马力唔算好大,而且刻意比人调教过转向同埋有一大堆电子设备,比左以前,一部后驱车如果超过300匹,保证日日都甩住出街。后驱车呢一个天性慢慢就变成一个表演,就系漂移运动。漂移嘅特点系要用尽可能快嘅速度去通过一个好长嘅距离,依家漂移比赛有自己嘅评分标准,比如横滑速度,车身嘅角度,车身嘅摆动,同埋车尾白烟多唔多等等,如果系特定比赛,仲会考虑埋同周围护栏够唔够接近,所以漂移好有观赏价值,再加上漂移本身就建立系部车失控嘅基础上面,所以如果学习到呢D救车技术,落雨跣胎就有机会无事。再加上漂移作为一种运动,考验手脚协调同判断力,有条件不妨学下,绝对唔系有型甘简单。
激烈猪扒----丰田 SUPRA JZA80 - Ryan  - Ryans 粤语车评博客
日本本土有一种好知名嘅赛事,叫做SUPER GT,以前叫做JGTC,意思系全日本锦标赛。JGTC开始系1993年开始举行,最初静系系日本国内赛道举办,不过由2005年开始,开始加入外国赛道,所以就连名都改成SUPER GT。根据非正式统计,SUPER GT每年有大约50万人观战,平均一场比赛可以召集超过54000个观众,系日本第一大赛车赛事。要参加Super GT比赛,原则系要用经过改装嘅量产车。呢D赛车虽然粒住一个量产跑车壳,但系其实里面所有野都已经系重新打造,比如SUPRA,虽然2JZ-GTE大力,但系因为实在太重,就会系赛车上面换成celica上面嘅3S-GTE引擎,保证耐用度之余仲会比较轻,而底盘方面,悬挂系统会重新做,前后都会设计成标准赛车双摇臂,用来提高过弯极限。SUPER GT根据引擎马力分成两个组别,有大约500匹嘅GT500组别,同埋唔超过300匹嘅GT300组别。SUPER GT之所以好睇系因为距有D比较奇特嘅规矩,比如一部赛车如果成绩越好,距要搭载嘅重物就越重,所以车队工程师就要根据每场赛事唔同嘅负重要求调整部车,所以系SUPER GT里面要连赢系好难嘅,但系正正因为甘,SUPER GT就更加有睇头。 

 

 

 

 

 

 

 
 
 

 

  评论这张
 
阅读(1237)| 评论(2)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017