注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

最出位番枧仔---------现代伊兰特朗动  

2012-12-20 15:03:16|  分类: 试车日记 |  标签: |举报 |字号 订阅

  下载LOFTER 我的照片书  |
最出位番枧仔---------现代伊兰特朗动 - Ryan  - Ryan粤语车评
     韩国车呢几年劲出位,直头同韩国嘅娱乐事业、电子产品一样咁猛料,部部好似未来战车咁嘅外形真系好睇到你眼琼琼!有好多朋友之前渣开日本车,都开始转玩韩国车,贪距价钱平多野玩,最紧要都系贪距够潮!唔知系咪天注定喇,同韩国一海之隔嘅日本今年比天灾打到头dup dup,一向已经积极到爆嘅韩国就更加进取,周围同D大厂倾合作,倾技术共享,做野认真又识得把握机会,抵距上位啦。尤其系今次呢部韩国现代Elantra,属于车系嘅第五代,依然有好多大胆设计,誓要引到你肯埋单为止。
 
最出位番枧仔---------现代伊兰特朗动 - Ryan  - Ryan粤语车评
今代Elantra依然叫做伊兰特,不过就系后面加左“朗动”两个字,因为挡风玻璃好斜,所以车头睇起身好短。除左有讲求流线型嘅圆碌碌番枧外形之外,仲特登系四只角同侧面整左D骨位翘起,有小小疑似coupe嘅格局,但系依然系一部四门三厢房车,配合四边刻意突出嘅沙板,成部车真系好醒神。最抵赞系宜家D新车都中意左抄右抄,不过系呢部车上面暂时都未睇到。
最出位番枧仔---------现代伊兰特朗动 - Ryan  - Ryan粤语车评
去到车尾,因为都系想造一个coupe嘅线条,所以会见到距嘅尾玻璃想刻意压低小小,而且显得车尾好短,短尾会显得部车劲D。尾箱盖其实有小小造型,都系疑似集成左扰流系里面。车尾另外一个最靓嘅地方就系尾灯,呢对咁妖嘅尾灯其实同头灯差唔多造型,只不过颜色上、摆位上有些少分别,而且尾灯有一边向住后门边走,宜家好多新款车都中意咁整。 最后就系因为呢部车真系好似跑车,所以车尾会好明显升起,所以尾泵把都特别巨型,而下面就有D黑色嘅防刮塑胶。
最出位番枧仔---------现代伊兰特朗动 - Ryan  - Ryan粤语车评
 入到来内笼,因为我太耐无接触韩国车,我觉得变化真系好大。以前觉得虽然现代嘅内笼唔算丑,但系感觉上都系斋D,而今次呢部车就唔系,距用左好多哑光颜色面板去撞翻黑色,虽然摸上手都知道系cheap野用料,但系斋望唔摸就无乜所谓。个中控台又好有型喔,线条又斜斜地,D制又唔算好复杂,比半个钟头应该都可以摸熟音响冷气。我大致上讲讲呢部车有D乜嘢装备先,呢部系1.6朗动里面嘅顶级版,首先系用左电太,入门版系用封油太,六速手自一体波箱,四轮碟刹,车胎系205/55 R16,电窗电镜,真皮粗身太环,行车电脑,自动冷气,6喇叭音响,AUX接口,定速巡航,倒车雷达,四个气囊,免匙启动,最值得讲就系呢部车嘅太感,由着车打太到部车行紧,都会觉得今代太感实净好多,而且太环又够粗,开起身就系唔同D。
最出位番枧仔---------现代伊兰特朗动 - Ryan  - Ryan粤语车评
仪表板都系今次改款嘅重点,两个炮筒型大表再加两个单色显示屏,下面系D指示灯同警告灯。转速表同时速表都似日本车,尤其系D颜色,至于两个细屏幕,就系显示D油耗同档位,仲有水温同汽油,都系D简单嘅行车电脑设定。总体来讲都系靓字行先,功能同其他车差唔多。 
最出位番枧仔---------现代伊兰特朗动 - Ryan  - Ryan粤语车评
前排嘅空间有两样野需要留意,第一就系今代偷位偷得好尽,你坐落就会发觉,乜原来储物空间可以咁搞架?距连只车门都偷到尽,虽然咁样会多左地方放杂物,但系就会觉得部车比较单薄,无乜安全感。第二个要留意嘅就系距两张前座,呢两张凳真系唔会输比同级任何一部车,尤其系大比位支撑,对条腰嘅支撑都几舒服,如果买呢部车翻来纯粹代步,真系会几中意呢两张凳。
最出位番枧仔---------现代伊兰特朗动 - Ryan  - Ryan粤语车评
好离奇,呢部车嘅后排同前排嘅感觉完全唔同,后排反而有小小运动化,唔似一般同级日本车,首先系坐垫比较硬,而且比较凹,你坐落去会觉得有小小包身,而且因为整到凹入去,头顶空间都无咁局促,真系好难得。后排有冷气出风口,而系冷气出风口下面通常都会突起,因为车底呢个部位系排气管,不过呢部车又唔算好凸,平时坐两个人当然无问题啦,必要时中间坐第三个人都无咁辛苦。
最出位番枧仔---------现代伊兰特朗动 - Ryan  - Ryan粤语车评
呢部车用左一副1.6升自然吸气引擎,最大马力大概126匹,最大扭矩大概155牛米,数字上唔算乜嘢大马力,不过配合翻呢部车嘅车重其实都岩岩好,因为平时都试唔同嘅车,都会有比较,所以唔可以一概而论呢部车好定唔好,但系开起身我觉得呢部车真系摆左好多心机落去。首先系着车,有头先讲过嘅实净太感,有时开车唔系一定要开快车,主要都系讲感觉,你觉得部车渣上手系开心嘅,话知距又大食又无力,因为快有快好玩,慢有慢写意。除此之外,部车嘅反应唔算慢,呢个新嘅6前速波箱,讲到底都系自动波,就算你切换手动模式,加减波都会因为保护模式而无咁应,但系如果你好顺咁开,距同引擎嘅匹配都OK,起码无chok下chok下,如果你想买呢部车,到时去车行试车可以重点留意下呢D,仲有就系转弯,以前嘅Elantra转弯都系有D傻下傻下嘅感觉,今代无晒,几听话。 最出位番枧仔---------现代伊兰特朗动 - Ryan  - Ryan粤语车评
我知道到宜家都有好多人睇唔起韩国车,甚至会话,挑!日本车我都唔买啦,点会买韩国车啊?但系当韩国野hit爆地球之后,又真系唔到你唔服。好似韩国车咁,其实距都曾经山寨过,都试过左抄右抄,最初都系靠引入其他车厂技术,改头换面厄厄氹氹。不过韩国系1962年制定左《汽车工业保护法》,进口车关税高到离晒谱,一直到1985年韩国汽车工业基本成熟之后,先开始低翻。另外仲有非关税壁垒,限制进口车销售,唔比系电视同报刊卖广告。如果你买外国贵车,会比人调查,另外仲有好多反奢侈同提倡买韩国货嘅运动。以前乜嘢人买韩国车呢?贪平贪配置果D,所以惯性思维一代传一代,宜家D人有理无理都话韩国车唔得,你买人身攻击你,但系你可以睇下,佛山宜家都有D韩国车做的士,比如起亚远舰同现代旧款索纳塔,做得的士,质量一定系有翻咁上下,所以其实近几年嘅韩国车已经越来越少技术上嘅问题,最多都系话距用料唔够靓,唔够高档。其实韩国车依然都系属于国民车,主打性价比,同豪华无乜关系,除非去到高端小小嘅车,但系都好中意堆砌配置,难得今次回头是岸,将设计摆翻系外形同机械上面,绝对系进步。当然,唔系部部韩国车都有进步,里面都有D求其之作,但系以车论车,就讲翻呢部Elantra,起码比上一代好。
  评论这张
 
阅读(1476)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017