注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

粤车无数

国内首个粤语车评博客,部分图片来源网络。

 
 
 

日志

 
 

马到功成-----宝马M3(E30)  

2012-02-10 17:35:18|  分类: 经典名车 |  标签: |举报 |字号 订阅

  下载LOFTER 我的照片书  |
机械诱惑-----宝马M3(E30) - Ryan  - Ryans 粤语车评博客
见到宝马车尾贴住个“M”字,第一反应都会去鉴别下系米真系“M乜乜”或者“乜乜M”,系唔系都好,个脑都自自然然就会联想到距地系赛车场度点样杀敌,呢个系“M”字嘅魅力。“M”,其实代表住BMW Motorsport GmbH公司,从1972年开始就已经专门造一D贴住蓝白旗徽章既怪兽征战赛道同街道,尤其系宝马3系。3系同奔驰C级都系同级别高性能房车既经典,只不过奔驰C级系C63 AMG COUPE之前一直都系用四门房车形式出现,而M3好早就出双门版,所以跑车车迷会比较偏向M3。宝马3系经历过好多代进化,代号E30嘅普通3系从1986年开始制造,直到1992年先停产。E30 M3系“M3”家族嘅第一代,同样系1986年出世,属于高性能6系同5系之后嘅补充车型。宝马之前都系用高性能6系参赛,直到M3出现之后就代替左6系比赛。
机械诱惑-----宝马M3(E30) - Ryan  - Ryans 粤语车评博客

话晒都系一代名驹,或者我简单介绍下距D战绩。其实M3嘅出现,主要都系为左参加比赛。1986年开始就开始征战DTM德国房车大师赛。除左DTM,仲有其他房车赛事同耐力赛冠军。我地国家汽车文化发展起步慢,不过好早已经有乡亲父老来往香港澳门做生意,所以亚洲车迷比较熟嘅,应该就系宝马派M3参加每年一度嘅澳门大赛车。1987年开始,第一代M3就代替当时嘅635CSI出战澳门东望洋赛道,第一次参赛就已经有齐冠、亚、季军,成绩无人能及。最令车迷兴奋嘅,当然系E30 M3恶斗R32 GTR嘅情景,两款车系出名难跑嘅澳门赛道上面,你勾下我,我勾下你,非常之有睇头。

机械诱惑-----宝马M3(E30) - Ryan  - Ryans 粤语车评博客
作为古老既高性能3系,距有好多果阵时宝马汽车既标志性建筑物。比如又窄又长既中网,四盏无灯罩既头灯同埋一个好经典既宝马车身比例。M3都有美版同欧版,欧版转弯灯系前泵把,而美版转弯灯就系前辘后面既沙板度。M3前后都有夸张抛沙版设计,由于要保留敏捷转向反应,前辘比较窄。系果个年代系一个最有代表性既指标,唔理系咩款头,最紧要有心有力。无几耐,日本就出现左一部被称为“东瀛战神”嘅日产SKYLINE GT-R R32,如果熟悉呢部车,都会留意到距前后抛沙版设计同M3好似,所以经典嘅设计会系好容易会被人抄。
机械诱惑-----宝马M3(E30) - Ryan  - Ryans 粤语车评博客
今时今日,周街都系车,新款旧款型仔款薯look款乜款都有,E30 M3噶车尾难免会有D老土,但系如果20年前开部呢D行出街,绝对系一个焦点。M3同普通3系有一个好明显嘅区别,就系后挡风玻璃会比一般3系斜,再加埋一只唔高唔低定风翼,可以减低高速时候嘅风阻。
机械诱惑-----宝马M3(E30) - Ryan  - Ryans 粤语车评博客
80年代同无论3系5系定7系,头冚都系向前反开,虽然古怪,但系就可以避免高速嘅时候车头盖比风刮起打落块挡风玻璃度,缺点就系整水箱或者其他龙门架零件比较麻烦,唔就手而且怕距夹亲手。不过保险丝盒就放得岩喇,一目了然。E30时期嘅M3引擎都好唔简单,首先系摆放嘅位置,引擎向右边避震机塔顶倾斜,一来前轴左右有更好重量分布,二来果个巨型入气系统有地方放。跟住就系独立节气门同埋一个巨型集气箱,即系写住M POWER果个,独立节气门从E30开始直到E36、E46甚至宜家E92嘅M3都系度用紧,进气通道好短而且好直,再加埋不锈钢头蕉,对高转速发挥有好大帮助。中缸来自有20年历史代号M10嘅直列四缸引擎,最神奇嘅就系缸盖,之前宝马有一部超级跑车M1,上面有一副M88六缸引擎,“M”经过重新设计,将M88缸盖技术移植到一个四缸缸盖上面,跟住同之前讲过嘅M10中缸合体。引擎搞掂,但系都要有个名,于是就将呢副引擎叫做S14。呢副引擎分两个版本,一个系街车版2.3排量S14B23,另外一个系赛车版2.5排量S14B25,唔同排量出力梗系有分别啦,我系度简单列举下。

S14B23:195匹、1985年

S14 EVO:220匹、1987年、M3 Evo I;

S14B25:238匹、1989年、M3 Evo II;

S14B20:195匹、1989年、E30 320iS;

S14/1:2.3L、300匹、1988年、M30 M3 Racing;

S14/2:2.5L、325匹、1989年、M30 M3 Racing;

S14/3:2.3L、325匹、1989年;

S14/4:1990cc、260匹、1991年;

S14/5:2.5L、330匹、1991年;

S14/6:2.5L、325匹、1991年;

S14/7:1990cc、275匹、1993年、E36 M3赛车版。

机械诱惑-----宝马M3(E30) - Ryan  - Ryans 粤语车评博客

E30 M3内笼布局对于行街车来讲好简单,但系对于赛车来讲够晒喇。原装已经有两张花布桶椅,电动门窗开关依然系波棍隔离,音响当然唔系CD啦,依然系播放录音带。天窗宜家系好多人买车嘅一个心愿,E30 M3都有,如果系美版,距系标配电动天窗,如果系欧版,就要加钱选装。如果系美版M3,就用一副Getrag 260五前速手波,而且呢副波箱系325i上面系标配,美版波箱齿比会比欧版疏,因为如果系密齿比,成日跑高速油耗会好高而且唔够静,但系为左保留凌厉加速感觉,美版波箱尾牙会设计得比较大,弥补翻波箱疏齿比嘅缺点。呢副波箱嘅波棍操作同宜家市面上嘅五前速波箱唔同,距一档系系宜家一般波箱嘅二档位置,而倒挡就系宜家一般波箱嘅一档位置,如果系赛车,甘样设计其实更加好用。

机械诱惑-----宝马M3(E30) - Ryan  - Ryans 粤语车评博客

高性能跑车唔一定都系冷冰冰,E30 M3都有开篷版,用左出名易坏同易漏水嘅软篷设计。不过E30出名机械感强,开蓬或者可以将原先已经好劲嘅速度感再次放大,关左个蓬就算漏水都唔怕啦,话晒都系M3,只要唔塞车唔坏车又遵守交通规则唔比啊SIR截停,应该好快翻到停车场。

机械诱惑-----宝马M3(E30) - Ryan  - Ryans 粤语车评博客
虽然系一部高性能车,但系E30底盘部分可以话好简单,前悬挂用麦佛逊设计,宜家D3系都仲用紧,只不过E30时代更加简单,到左赛车场,甘嘅设计反而仲容易维修同更换。E30后悬挂用左拖拽臂设计,20年前呢仲悬挂设计好兴,结构简单,但系刚性唔高,部车向前行就无乜问题,但系过弯嘅支撑力就唔够,所以到左下一代E36 M3,后悬挂变成多连杆设计。科技系不断进步,而以往嘅技术都应该得闲回味下。
机械诱惑-----宝马M3(E30) - Ryan  - Ryans 粤语车评博客
20几年对于一个人来讲系壮年,但系对于车来讲可能就意味著拉柴。其实E30 M3比油反应好快,副引擎都好顺,其实讲到加速,距最快都要6秒几先可以完成零到一百,但系距嘅强项应该系攻弯。E30 M3 系街道嘅表现唔会差,慢弯快弯感觉都好淡定,虽然系后驱,如果唔系转登去逼距,都唔会易甩尾,推头基本无乜,而且避震都好跟得上,虽然机械结构唔先进,但系调教就非常之好。玩呢D车,随左要有距年纪大维修贵嘅心理准备之外,最紧要系要欣赏距嘅内涵,如果呢D车宜家系街度飞,好话唔好听普通一部2.5房车都可以抛离距,但系讲到过弯,以前嘅车扎实装嵌水准配合岩岩好嘅马力,再加上有种时空交替嘅错觉,果种乐趣唔系买部靓靓新车就可以有。
机械诱惑-----宝马M3(E30) - Ryan  - Ryans 粤语车评博客
好多车迷朋友都知道德国有一条超长赛道,叫做纽堡林。M3系呢条“绿色地狱”上面留低左好多胎痕。宜家好多朋友都有车,或者已经考紧牌准备买车,街上面越来越多新手,危险程度已经唔系一两年前可以相比。驾驶技术,系要通过不断练习,再加上自己思考先会有效果,驾驶学校里面教嘅野,就算几复杂都只系一个基础。所以好现实嘅,一个人嘅驾驶技术,唔系靠斋UP,而系要睇距肯用几多钱系汽油同车胎身上。每一次出门,每一次行驶都应该有进步,如果唔系,sai左部车,sai左你时间。所以希望大家真系多D练习,我知道汽油好贵,车胎都好贵,但系无办法,命仔仲贵。机械诱惑-----宝马M3(E30) - Ryan  - Ryans 粤语车评博客  
M3呢一类型嘅车,虽然话就话系街道跑车,但系天生就唔系属于街道。一来街道人多车多,踩油无几耐就啉住收油,无瘾,二来一般高性能跑车引擎都比较偏向高转速,长期低转速系条街度爬,盏sai左部车。甘当然啦,高性能车外形潇洒,要型仔上街游下游下增加收视率,甘又系另外一回事,所以要证明你买车用嘅每一蚊都有价值,最好都系带距去赛车场,同一班识得欣赏你部车嘅人一齐玩,点都好过系街度行,D人系会望,但系可能未必识得你部车系乜来头。当你得到一样好野,其实唔应该第一时间拖出街比人观摩,而系自己先玩到透,人车合一然后再偶然出街比人欣赏,因为呢个时候,D人已经吴单只欣赏你部车,更加开始欣赏你。
  评论这张
 
阅读(1443)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017